Almatydaǵy «Ǵylym ordasynda» Ulttyq ınjenerlik akademııanyń jalpy jınalysy ótip, onda elimizdiń úzdik ınjenerleri anyqtaldy.
«Qazaqstannyń úzdik ınjeneri» atalymy boıynsha óndiristiń jetekshi ǵalymdary men ınjenerlerin, iri kompanııalar men uıymdardyń jáne ǵylymı-zertteý ınstıtýttardyń qyzmetkerleri arasyndaǵy naǵyz mamandy anyqtaıtyn baıqaý jyl saıyn uıymdastyrylady. Sondaı-aq, Ulttyq ınjenerlik akademııa «Qazaqstannyń qurmetti ınjeneri» ataǵyn berýdi de dástúrli túrde jalǵastyryp keledi. Bıyl bul marapatqa belgili qoǵam qaıratkerleri Nyǵmetjan Esenǵarın men M.Esenov laıyq dep tabylyp, akademııanyń arnaıy dıplomy men tós belgisi tapsyryldy.
Al «Qazaqstannyń úzdik ınjeneri» marapaty Astana qalasy boıynsha ınfraqurylymdyq qaıta qurýdyń iri ınnovasııalyq baǵdarlamalaryn iske asyrýǵa úles qosqany úshin Sergeı Horoshýn, medısınaǵa jáne elektronıkaǵa nanoqurylymdy materıaldardy ázirlep, engizgeni úshin Artem Kozlovskıı, Almaty oblysynda júgerini qaıta tereńdete óńdeý boıynsha kásiporyndarynyń ınnovasııalyq keshenin turǵyzǵany úshin Zakırjan Kýzıev, «Alataý Jaryq Kompanııasy» AQ jelilerinde energııa tıimdilik ádisterin jasaý jáne engizýge qol jetkizgeni úshin Altaı Abdrahmanov, KazSTSat ǵarysh apparatyn ázirleýge qatysqany úshin Arman Bekembaev, Qazaqstanda alǵash ret munaı qubyrlaryna vıntti sorǵylardy jáne shyny plastıkalyq qubyrlardy ornatqany úshin Nysanbaı Qýantaev, fosfor ónerkásibi kásiporyndarynda pesh gazyn paıdalaný boıynsha ınnovasııalyq tehnologııalardy engizgeni úshin Leonıd Frangýlıdı jáne Sergeı Asaınov «Bogatyr kómir» shahtalarynda aýa bólý tehnologııasyna ınnovasııalyq ádister engizgeni úshin berildi.
Qalmahanbet MUQAMETQALI, «Egemen Qazaqstan»