«Egemen Qazaqstan» gazetiniń jýrnalısteri Almatydaǵy fızıka-matematıka baǵyty boıynsha tereńdetip oqytatyn Nazarbaev Zııatkerlik mektebiniń ujymymen kezdesti. Basylymnyń negizgi oqyrmandary sanalatyn muǵalimder qaýymy men atalǵan mekteptiń jas shákirtteri rýhanı keshten ádemi áser alyp qaıtty.
Kezdesýge «Egemen Qazaqstan» gazetiniń ardageri, Qazaqstannyń qurmetti jýrnalısi Mamadııar Jaqyp pen basylymnyń Almatydaǵy tilshiler qosynynyń basshysy Nurǵalı Oraz qatysty. Basqosý barysynda basylymdaǵy muǵalimderge arnalǵan arnaıy «Tálim», «Bilim» betteriniń úzdiksiz shyǵyp kele jatqandyǵy, bul óz kezeginde ustazdar men ata-analardyń, ósip kele jatqan óskeleń urpaqtyń ıgiligine baǵyttalǵan joba ekendigi keńinen aıtyldy. Oqýshylar basylymnyń arǵy-bergi tarıhy, ótkeni men búgini jaıly kóptegen maǵlumatqa qanyǵyp, aǵalaryna saýaldaryn joldady. Joǵarǵy synyp oqýshylary kúmbirletip kúı oınap, jyrdan shashý shashty.
Kezdesýde ardager jýrnalıst Mamadııar Jaqyp mektep ujymyna alǵysyn aıtyp, «ǵasyrǵa jýyq tarıhy bar ata basylym «Egemen Qazaqstan» gazeti elimizdiń mektepterimen shyǵarmashylyq baılanys jasaýdy árdaıym nazarda ustap keledi. Nazarbaev zııatkerlik mektepteri bilim berýdiń barlyq talaptaryna, zamanaýı standarttaryna saı elimizdegi eń bir irgeli bilim shańyraǵy dep bilemiz. Biz nebir qıyn zamandardy kórdik. Jertólede sabaq oqyǵan kúnimiz bolǵan. Oqýǵa kitap tappaıtynbyz. Al, qazir zaman sizderdiki. Oqyp bilim alýlaryńyz úshin ýaqyt talabyna saı barlyq jaǵdaı jasalǵan. Halqymyz «Bilekti birdi, bilimdi myńdy jyǵady» dep beker aıtpasa kerek. Rasynda da, qazir bilimniń, biliktiń zamany. Adamdy bıikke kóteretin – oqý-bilim, jaqsy minez, jaqsy tárbıe. Endeshe, jan-jaqty saýatty, bilimdi, zerdeli, básekege qabiletti, rýhanı dúnıesi baı azamat bolyp qalyptasýlaryńyzǵa tilektespin» dep aq tilegin bildirdi.
2014 jyly ashylǵan bilim ordasynda búgingi tańda myńnan astam shákirt bilim alýda. Oqytýshylar quramy tájirıbesi mol bilikti mamandardan quralǵan. Shet elderden arnaıy shaqyrtylǵan ustazdar dáris beredi. Bir aıta keterligi, az jyldar ishinde atalǵan mekteptiń shákirtteri halyqaralyq olımpıadalarda top jaryp, jas zııatkerlerge arnalǵan álemdik jobalarda kósh basynan kóringen. «Bul mektep ujymyna jasalǵan qoldaý men ustazdar tarapynan qoıylatyn joǵary talaptyń, zor izdenistiń nátıjesi deıdi» shákirtter.
Kezdesý sońynda mektep basshylyǵy kelgen qonaqtarǵa zor alǵysyn bildirip, oqýshylardyń óz qolynan jasalǵan estelik syılyqtaryn tartý etti.
Arman OKTIаBR,
«Egemen Qazaqstan»
ALMATY