Búgin elektrondyq saýda-sattyqty damytý máselesin qaraý qorytyndysy boıynsha QR Úkimeti otyrysynda Premer-Mınıstr Baqytjan Saǵyntaev tutynýshylardyń quqyqtaryn qorǵaýdy jáne bıznesti onlaın saýda-sattyqqa yntalandyrý boıynsha tásilderdi qarastyratyn zańnamany jetildirý sharalaryn qabyldaýdy tapsyrdy.
Ulttyq ekonomıkanyń birinshi vıse-mınıstri Rýslan Dálenov elektrondyq kommersııany tıimdi damytý maqsatynda Elektrondyq saýda-sattyqty damytý boıynsha 2018-2020 jyldarǵa arnalǵan Jol kartasy ázirlengenin jáne bekitilgenin baıandady. «Internet-dúken» túsinigin, sondaı-aq satýshylar men deldaldardyń ınternet-dúkender qurý máselelerin reglamentteıtin normalardy qarastyratyn «Saýda qyzmetin retteý týraly» zańǵa túzetýler jasaldy.
Sondaı-aq, mobıldi tólemderdiń jeńildetilgen tetigin engizýdi yntalandyrý, mobıldi tólemderge komıssııany tómendetý boıynsha usynystar, elektrondyq shot-faktýrany paıdalanýǵa tolyq kóshýdi qamtamasyz etý máseleleri pysyqtalýda.
Jol kartasynda sondaı-aq UNCTAD kórsetkishterin arttyrý boıynsha is-sharalar qarastyrylǵan. Málim bolǵandaı, ótken jyly Qazaqstan 88-shi, al 2017 jyly — 51-shi orynǵa ıe boldy.
Aqparat jáne kommýnıkasııalar mınıstri Dáýren Abaev, qarjy mınıstri Baqyt Sultanov, «Qazposhta» AQ basqarma tóraǵasy Sáken Sársenov elektrondyq kommersııany damytý boıynsha qabyldanǵan sharalar týraly baıandady.
Máseleni qarastyrý qorytyndysy boıynsha Premer-Mınıstr elektrondyq saýda-sattyqty damytý úshin elimizde biraz jumys atqarylyp jatqanyn, salyq jeńildikteri beriletinin, sáıkes Jol kartasy ázirlengenin, alaıda sonymen birge tutynýshylardyń quqyqtaryn qorǵaý týraly umytpaý kerek ekenin atap ótti.
Osyǵan baılanysty ulttyq ekonomıka mınıstrligine múddeli memlekettik organdarmen jáne uıymdarmen birge tutynýshylardyń quqyqtaryn qorǵaýdy jáne bıznesti onlaın saýda-sattyqqa yntalandyrý boıynsha tásilderdi qarastyratyn zańnamany jetildirý sharalaryn qabyldaý tapsyryldy.
Investısııalar jáne damý, ulttyq ekonomıka mınıstrlikterine elektrondyq kommersııanyń jedeldetilgen damýyna baǵyttalǵan ózindik óndiris taýarlary, jumystar jáne qyzmet kórsetýler tizimin keńeıtý máselelerin pysyqtaý tapsyryldy.