Almatydaǵy aty ańyzǵa aınalǵan «Medeý» muz aıdynyna syrǵanaq teýip, taýdyń jupar aýasymen tynystaýǵa keletinderdiń sany bıyl jyldaǵydan edáýir kóbeıgen. Onyń sebebi atalǵan muz aıdynynda «Sporttyq Almaty» baǵdarlamasynyń sheńberinde dástúrli tegin úıretý sabaqtary júrip jatyr.
Aptanyń senbi-jeksenbi kúnderi kóptegen Almatylyqtar Alataý baýraıyndaǵy Medeý shatqalyn betke alady. Ár taraptan aǵylǵan oblys pen qala turǵyndarynyń tegin úırený sabaqtaryna qatysyp, syrǵanaý óneriniń qyr-syryna qanyǵyp, emin-erkin demalýyna barlyq jaǵdaı jasalǵan. Sporttyq sharaǵa ártúrli jastaǵy áýesqoılar qatysa alady. Tegin úırený baǵdarlamasynyń arqasynda búgingi kúni 1500-ge jýyq azamat arnaıy mamandardan sabaq alǵan.
– Biz otbasymyzben konkı tebýdi unatamyz. Medeýge, otbasymyzben, dostarymyzben birge kelip turý bizdiń súıikti isimizge aınalǵan. Medeý – tarıhy tereńde jatqan ásem qalamyzdyń eń kórikti jerleriniń biri. О́zge aımaqtarda turatyn týystarymyz qonaqqa kele qalsa aldymen Medeý men Kóktóbege aparýymyzdy suraıdy. Arnaıy mamandardyń kelýshilerdi syrǵanaq tebýge aqysyz úıretýi halyqqa kórsetilgen úlken qoldaý dep bilemiz. Búgin alǵash ret sporttyq oıynǵa qatysyp syılyqtar utyp aldyq. Uıymdastyrýshylarǵa zor alǵys bildiremiz, – deıdi qala turǵyny Tatıana Sopkova. Jalǵyz Tatıana ǵana emes, sporttyq jobaǵa qatysqan barlyq qonaqtar uıymdastyrýshylarǵa dán rıza.
Eske salsaq, «Medeý» muz aıdynynyń qonaqtary ár aptanyń senbi men jeksenbi kúnderi keshki saǵat jetiden toǵyzǵa deıin arnaıy nusqaýshylardyń kómegimen konkıde syrǵanaýdy tegin úırene alady. Sonymen birge, Medeý kelýshilerin arnaıy syılyqtarmen qýantyp, tamasha konserttik baǵdarlamalar syılaıtyn bolady. Konkımen syrǵanaýǵa aqysyz túrde úıretý sabaqtary jeltoqsan aıynyń 24-ne deıin jalǵasyp, kelesi jyldyń qańtarynda qaıta iske qosylmaq.
«Sporttyq sharanyń basty maqsaty qaladaǵy buqaralyq sport túrlerin damytyp, qala turǵyndary men qonaqtaryn salaýatty ómir saltyn ustanýǵa shaqyrý» deıdi jobany uıymdastyrýshylar.
Arman OKTIаBR, «Egemen Qazaqstan»
ALMATY