Baıanaýyl aerodromyna 18 oryndyq «Let-410» jolaýshylar ushaǵy qondy. Bul týraly pavlodar.gov.kz habarlady.
Pavlodardan shyqqan 16 jolaýshy Baıanaýylǵa jeńil avıasııaǵa jatatyn eki motorly 18 oryndyq ushaqpen ushyp keldi. Áýe kemesi 40 mınýtta jetti.
Pavlodar oblysy ákiminiń baspasóz qyzmetiniń málimetine qaraǵanda, reıske jergilikti áýe baǵyttarynda ushý oryndaýda tájirıbesi bar «Jezqazǵan Eır» kompanııasy qyzmet kórsetken.
«Biz Pavlodar-Baıanaýyl baǵyty boıynsha birinshi ret ushyp otyrmyz. Ushý sátti aıaqtaldy. Baıanaýyl aerodromy qonaqtardy kútýge tolyq daıyn dep oılaımyn», - dedi ushaq kapıtany Sergeı Terehov.
Aıta keteıik, maýsym aıynyń ortasynda 25 jyldyq úzilisten keıin Baıanaýyl aerodromyna Pavlodardan ushqan ushaq alǵash ret qonǵan bolatyn. Baıanaýyl aerodromynda qyzmet kórsetetin ushaqtar Qaraǵandy avıasııalyq oqý-jattyǵý ortalyǵynan ákelindi. Jolaqtardyń sapasyn eki oryndyq ushaqtar tekserip kórdi. Áýe kemesiniń komandıri Valerıı Sıbagatýlın jolaqtar sapasynyń kez-kelgen eki, tórt, alty jáne segiz oryndyq borttardyń qonýyna múmkindigi jetetinin atap ótti.