Ulybrıtanııa premer-mınıstri Tereza Meı Reseı bıligin Brıtan úkimetine kıligip, saılaýǵa kedergi jasaǵysy keldi dep aıyptady, dep jazady BBC.
London qalasy meriniń banketinde sóz alǵan premer-mınıstr Tereza Meı Vladımır Pýtınniń úkimeti «erkin qoǵamnyń» shyrqyn buzýǵa tyrysyp jatqanyn aıtty. Brıtan úkimeti basshysynyń aıtýynsha, Máskeý jalǵan aqparat taratyp, Batysta alaýyzdyq týǵyzǵysy keledi. Degenmen, premer-mınıstr Londonnyń Reseımen teke tireske túskisi kelmeıtinin, biraq Ulybrıtanııa óz múddesin qorǵaıtynyn sóz etti.
«Reseı bizdiń «oıynnyń» erejesin bilgende ǵana Batystyń senimdi serigi bola alady» degen premer-mınıstr Reseı Eýropadaǵy birneshe eldiń áýe keńistigine buzyp kirip, maqsatty túrde bólshektegisi kelgenin alǵa tartty. «Buǵan, olardyń saılaýǵa aralasýyn jáne Danııa Qorǵanys mınıstrligi men Býndestagqa jasaǵan hakerlik shabýylyn jatqyzýǵa bolady», - deıdi Meı.
Tereza Meı Ulybrıtanııa Eýroodaqtan ketip, NATO-ǵa tolyqtaı bet buratynyn aıtty. «Lıberaldyq qundylyqtarymyzdy nyǵaıtatyn» «breksıt» týraly kelisim jasasýǵa tyrysamyz», - dedi Meı.
Sondaı-aq ol BUU Qaýipsizdik keńesiniń turaqty múshesi retinde Reseı halyqaralyq turaqtylyqty damytýda mańyzdy ról atqaratynyn da atap ótti. Reseıdiń basqa joldy tańdaıtynyna úmit artqan Meı: «Biz eki el múddesin jáne álemdik tártipti qorǵaý úshin birge áreket etemiz», - dedi.
Tereza Meıdiń aıtqandary Donald Tramptyń sózderine qarsy pikir retinde qabyldandy. О́tken aptada AQSh prezıdenti Reseı bıliginiń Amerıkadaǵy prezıdenttik saılaýǵa aralaspaıtynyn, ol jaǵynan Vladımır Pýtınge senetindigin jetkizgen edi.