Oblys ortalyǵyna qaraıtyn Pavlodar aýylynyń halqy jylyjaıda ósirgen kókónis, baý-baqsha ónimderimen ózderin de, ózge aýyldardy, qalany da qamtamasyz etýde. Aýyl mańynda ıgerilmeı jatqan 60 gektar jer kókónis ósýirýshi turǵyndarǵa berilgen. Aýyl ákimi Ajdar Júsipovtiń aıtýynsha, 1 otbasyna 1 gektar tıesili, ol azdyq etse jalǵa beriletin jer kólemi ulǵaıtylady.
Turǵyndar aýlalaryna jylyjaı jasap alǵan. Aýyldaǵy 370 jylyjaıda qııar ósiriledi. Gúl egýdi, basqa da kókónis túrlerin ósirýdi qolǵa alǵan turǵyndar da bar.
– Kókónis ósirýdiń eń tıimdi joly – jylyjaı sharýashylyǵyn damytý, óıtkeni suranys joǵary. Sondyqtan shaǵyn ǵana jylyjaıdyń ónimderin satyp tapqan tabys bir otbasyn asyraýǵa jetedi,– deıdi jergilikti kásipker Oksana Voronına.
Aýylda úlkendi-kishili 600 jylyjaı, 47 jeke kásipkerlik nysany jumys jasaıdy. Olardyń qatarynda 24 dúken, dárihana, tis emhanasy bar. Búginde tigin sehy men jekemenshik balabaqsha ashýǵa nıettenip otyrǵandar jetkilikti.
Rústem Qusanovtyń «Qusanov» jeke sharýashylyǵy basqalarǵa úlgi bolarlyqtaı. Sharýashylyq 7 jyldan beri qııar, qyzanaq ósirip, qoljetimdi baǵamen saýdalaıdy. Jylyjaı salyp, uńǵyma qazyp, sýarý júıesin qurý úshin 7 mıllıon teńgedeı qarjy jumsalǵan. Aýyldyqtarǵa da jumys bar, «Qusanov» jylyjaıynda eńbek etedi. Sharýashylyqtyń 6 gektar jeriniń, 2 gektaryna – qyryqqabat, 1,5 gektaryna – qyzanaq, 1,5 gektarǵa qııar egiledi. Bıyl qarbyz ósire bastady. Keler jyly golland júgerisin ósirmekshi. Sharýashylyq tamshylatyp sýarý ádisin qoldanady.
Al jylyjaı sharýashylyǵyn damytý úshin kásipker Rýslan Tursynhanov bolsa sheteldik ınnovasııalarǵa nazar aýdarypty. Endi kún energııasy jáne jel generatorlarynyń qýaty arqyly jylyjaıynyń jumysyn júrgizbekshi. Soltústiktiń qaqaǵan sýyǵyna qaramaı-aq, qııar, qyzanaq ósirýdiń ınnovasııalyq ıdeıasy bar kórinedi.
Aýyl ákiminiń aıtýynsha, aýylda «EKSPO» dep atalatyn bazar ashyldy. Jergilikti halyq endi ónimderin osy bazarda sata alady. Kókónis ósirýshilerdiń ónimderin ótkizýge osylaı jaǵdaı jasalyp otyr. Burynǵydaı oblys ortalyǵyndaǵy bazarlarǵa ótkizip áýrelenbeıdi. Kásipker Oksana Voronınanyń jylyjaıynda qııardyń «Masha» , «German», «Lınara» dep atalatyn túrleri bar. Al jalpy, jylyjaılarda qııardyń 15 túrli sorty ósiriledi eken. Aýyldaǵy 600 jylyjaıdan maýsym saıyn 278 tonna ónim jınalady.
– Qııar bizdiń aýyldyń brendi. Ekologııalyq taza ónim. Bizdiń qııar dámdi, – deıdi aýyl halqy.
Farıda BYQAI, «Egemen Qazaqstan»
PAVLODAR