Bıyl 15 qarashada Bolat О́temuratovtyń Qory men «Qazaqstan Respýblıkasy Qyzyl jarty aı qoǵamy» QB arasynda tótenshe oqıǵalar kezinde zardap shekken Qazaqstan turǵyndaryna kómek kórsetý úshin yntymaqtastyq memorandýmyna qol qoıyldy.
Kómek qarjy ForteBank kómek kartalaryna aýdarylyp, keıin ony Qyzyl Jarty aı qyzmetkerleri tótenshe oqıǵalar oryn alǵan kezde zardap shekkenderge bólip beredi. Kómek somasy 67 200 000 teńgeni quraıdy. 33 600 000 mólsherindegi alǵashqy transh 2017 jyly, al ekinshi transh 2018 jyly aýdarylady. Bul týraly Qazaqstan baspasóz klýby málimdeme taratyp otyr.
Bir kartaǵa aýdarylatyn soma 20-30 myń teńge aralyǵynda bolady dep josparlanýda. Bul qarjyǵa tabıǵı apattyń alǵashqy kúnderi eń qajetti zattardyń barlyǵyn satyp alýǵa bolady. Atalmysh kómek memleket tarapynan qabyldanatyn sharalarmen qatar zardap shekkenderge kórsetiletin birinshi materıaldyq demeý bolady.
Atalmysh qaıyrymdylyq qorynyń ıesi Bolat О́temuratov: «Tabıǵı apat saldarynan adamdar baspanasyz qalyp, as-sýdan aıyrylǵan kezde men buǵan beı-jaı qarap tura almaımyn. Qordyń, ForteBank jáne Qyzyl Jarty aı qoǵamynyń birlese kúsh jumyldyrýy arqasynda biz alǵashqy gýmanıtarlyq kómekti kórsetetin bolamyz. Osy kóp tarapty bastamamyzdy bıznes ókilderi jáne qoǵamdyq uıymdar qoldaıdy dep úmittenemiz» dedi.
Qazaqstan Qyzyl jarty aı qoǵamynyń bas dırektory Elena Kım: «Bizdiń uıym apatty jaǵdaılar kezinde áreket etý jáne zardap shekkenderge kómek kórsetý isinde kóp jyldyq tájirıbe jınaqtaǵan. Biz halyqaralyq mashyqty qoldana otyryp, óz tetikterimizdi udaıy jetildirip otyramyz. Atalmysh seriktestik aıasynda daıyndalǵan mundaı júıeniń arqasynda biz turǵyndarǵa barynsha jyldam ári tıimdi túrde kómek kórsete alamyz» dedi.
«ForteBank» AQ basqarma tóraǵasy Maǵjan Áýezov tabıǵı apat saldarynan týyndaǵan tótenshe oqıǵalar kezinde zardap shekkenderge shapshań ári jedel túrde kómek kórsetý asa mańyzdy ekeni ataı otyryp, qabyldanatyn sheshimder tehnologııalyq jaǵynan joǵary, naqty, senimdi ári aıqyn bolýy tıis. Búgin qol qoıylǵan memorandýmnyń kózdegeni dál osy maqsat dedi.
«О́tken jyldardaǵy tájirıbeden túıgenimiz, qazaqstandyqtar zardap shekkenderge kómek kórsetýde aldyna jan salmaıdy, – deıdi Bolat О́temuratov qorynyń dırektory Marat Aıtmaǵambetov.
Aınash ESALI,
«Egemen Qazaqstan».
ALMATY