Memleket basshysy «Ulttyq ǵylymı medısınalyq ortalyq» aksıonerlik qoǵamy basqarmasynyń tóraǵasy Abaı Baıgenjındi qabyldady.
Kezdesýde Abaı Baıgenjın Qazaqstan Prezıdentine medısınalyq ortalyq qyzmetiniń negizgi nátıjeleri jóninde baıandady.
– 2003 jyldan beri kardıologııalyq aýrýlardan bolatyn adam óliminiń sany úsh eseden artyq qysqardy. Deı turǵanmen, elimizde onkologııalyq aýrýlarǵa qatysty ahýal kúrdeli bolyp tur, – dedi «Ulttyq ǵylymı medısınalyq ortalyq» aksıonerlik qoǵamy basqarmasynyń tóraǵasy.
Sondaı-aq, Nursultan Nazarbaevqa 2018 jylǵy maýsymda iske qosylýy josparlanyp otyrǵan jańa úlgidegi «Tomoterapııa» onkologııa ortalyǵynyń qurylysy jóninde málimdeldi.
Kezdesý sońynda Elbasy Qazaqstandaǵy onkologııalyq aýrýlardy emdeý isin odan ári jetildirý máselesi boıynsha birqatar naqty tapsyrma berdi.