Búginde ult ónerin búkil dúnıe júzine tanytýǵa talpynyp júrgen has talanttarymyzdyń biri Qazaqstannyń eńbek sińirgen qaıratkeri Súndet Baıǵojın ekeni talassyz.
Torǵaıda týǵan topjarǵan óziniń ózgeshe samǵaýymen az ǵana ýaqyt aralyǵynda sahna sańlaǵyna aınaldy. «Astana Opera» teatrynyń jetekshi solısi atanyp, kórermen kóńilinen oıyp oryn alǵan obrazdar jasady. Olardyń bárin saýsaq búgip sanamaı-aq, A.Jubanov pen L.Hamıdıdiń «Abaıyndaǵy» Abaı, E.Býrsılovskııdiń «Qyz Jibegindegi» Bekejan, Dj. Pýchchınıdiń «Madam Batterflıaıyndaǵy» Sharples, G.Donısettıdiń «Don Paskýalesindegi» Malatesta partııalaryn aıtsaq ta jetip jatyr.
Ol sondaı-aq, birqatar bedeldi halyqaralyq baıqaýlardyń laýreaty. Álemniń ár shalǵaıyndaǵy áıgili konsert zaldarynda óner kórsetkeni taǵy bar. Veronadaǵy Fılarmonıka teatrynda Dj.Pýchchınıdiń «Bogemasyndaǵy» Marsel jáne Dj.Rossınıdiń «Sevıldik shashtarazyndaǵy» Fıgaro rólderin oryndaǵanyn atap ótkenimiz oryndy.
Buıyrsa, bul ónerpazymyz endi jemisti shyǵarmashylyq jolyndaǵy kelesi shyńǵa bettedi. Qazylar alqasynyń qatal synynan súrinbegen Súndet baqtalastaryn basyp ozyp, ataqty Rım opera teatryna qabyldaýǵa múmkindik beretin joldamany jeńip aldy. Sátin salsa, Eýropadaǵy osynaý tanymal mádenıet ordasy qazaqstandyq jaryq juldyzben eki jyldyq kelisimshartqa otyrmaq. Elden estýimizshe, barıtondar báıgesine tórelik etken Domenıko Kolaıannı syndy korıfeıińiz onyń qabilet-qarymy ataǵy aspandaǵan La Skala ártisterinen kem soqpaıtynyn aıtqan kórinedi.
«Astana Opera» teatrynyń baspasóz qyzmeti taratqan aqjoltaı aqparatta baǵy janǵan Baıǵojınniń bir-eki aýyz lebizi berilgen eken. «Men óz elimniń patrıotymyn. Sondyqtan bolashaqta Otanymdy asqaqtata berýge aıanbaı úles qosamyn. Elbasymyzdyń «Rýhanı jańǵyrý» baǵdarlamasynda belgilengendeı Qazaqstan mádenıetin jahanǵa jaıý isine qyzmet etemin» delingen onda.
Sonymen Súndet Baıǵojın Rımdi baǵyndyrmaq. Biraq, baıaǵy Attıla babasyndaı rımdikterdi qylyshtyń júzimen emes ádemi ánderimen «qyrmaq».
Talǵat BATYRHAN, «Egemen Qazaqstan»