Astana qalasyndaǵy «Kórme» ortalyǵynda «Turǵyn úı-kommýnaldyq sharýashylyq – EKSPO jáne qurylys-2017» taqyrybynda halyqaralyq forým bastaldy. Eki kúnge jalǵasatyn sharany «Fair EXPO» men «EKSPO Servıs» kompanııalary uıymdastyrýda. Oǵan Investısııalar jáne damý mınıstrligi, Astana ákimdigi, qazaqstandyq TÚKSh-ny jańǵyrtý jáne damytý ortalyǵy qoldaý kórsetken.
Basqosýdyń saltanatty ashylý rásiminde «TKSh Qazortalyǵy» AQ basqarma tóraǵasy Nursultan Jıenbaev sóz sóılep, sharanyń mańyzdylyǵyna toqtaldy. Ol jaqyn arada Germanııadaǵy áriptesterimen birlesip turǵyn úı-kommýnaldyq sharýashylyq salasyna ınnovasııalardy engizýge kelisim jasalǵanyn eske saldy. Ol memorandýmǵa sáıkes kompanııalar TKSh-nyń jalpy strategııasy, turǵyn úı qoryn basqarý salasyndaǵy Qazaqstan zańnamasyn, energııany únemdeýdegi qanatqaqty jobalardy jetildirý jáne birlesip iske asyrý, sonymen birge ınvestısııalar, granttar tartý sekildi birneshe baǵyttar boıynsha yntymaqtastyq ornamaq.
Jıynda Reseı Federasııasynyń Qazaqstandaǵy saýda ókildiginiń keńesshisi Vladımır Benderskıı eki el arasyndaǵy baılanystardyń tıimdiligin, alys-beristiń aýqymdylyǵyn áńgimeledi. «Ár saladaǵy tájirıbe almasýlarymyz, saýda-sattyq qatynastarymyz qos memlekettiń ilgerileýine úles qosady. Bizdiń dostyǵymyz, tatýlyǵymyz úlken jetistikterge bastaýda. Osy jıyn da eki el kásiporyndarynyń birlese jumys atqarýyna yqpal eteri sózsiz», dedi ol.
Forým barysynda kórme uıymdastyrylyp, TÚKSh jáne qurylys salasyndaǵy jańalyqtar kópshilik nazaryna usynyldy. Onda Astana, Almaty, Stepnogor, Pavlodar, Qaraǵandy, Qostanaı, Shymkent, Oral, Kókshetaý, Aqtóbe, Atyraý, О́skemen qalalarynyń kásiporyndary qurylys tehnologııalaryn, jabdyqtaryn, sýdy daıyndaý, kárizdendirý, tazartý qurylǵylaryn, jobalaý, jylytý júıelerin, esepke alý aspaptaryn, elektr quraldaryn kórsetti. Sonymen qatar Reseı, Belarýs, Ýkraına, Germanııa, Túrkııa, Belgııa, Qytaı, Polsha ónimderi de bar.
Ashat RAIQUL, «Egemen Qazaqstan»