«University Medical Center» korporatıvtik qorynyń Ana men bala ulttyq ǵylymı ortalyǵynda Shala týǵan balalardyń halyqaralyq kúnine arnalǵan qaıyrymdylyq aksııasy ótti.
Búgin, 2017 jylǵy 17 qarashada «University Medical Center» korporatıvtik qorynyń Ana men bala ulttyq ǵylymı ortalyǵynda Shala týǵan balalardyń halyqaralyq kúnine arnalǵan shara uıymdastyryldy. Aksııa aıasynda elimizdiń barlyq óńirlerinen kelgen shala týylǵan balalar medısınalyq tekseristen ótkizilip, merekelik konsertte pasıentterdiń ata-analary men neonatolog dárigerler óner kórsetti, anımatorlar balalardyń kóńilderin kóterip, estelik syılyqtar tabys etti.
«UMC» korporatıvtik qorynyń Respýblıkalyq dıagnostıkalyq ortalyǵynyń pedıatrııa bóliminiń jáne Ana men bala ulttyq ǵylymı ortalyǵynyń 14 túrli sala boıynsha 30-dan astam mamandary: neonatolog, pedıatr, hırýrg, ortoped, ýrolog, kardıolog, pýlmonolog, nefrolog, endokrınolog, gastroenterolog, nevropatolog, otorınolarıngolog, okýlıst jáne dermatolog dárigerleri kelgen balalardy tekserýden ótkizip, keńesterin berdi. Zertteý nátıjeleri boıynsha balalardyń birazy jan-jaqty tereńdetilgen dıagnostıkalyq-ınstrýmentaldyq zertteýden ótýge jiberildi. jatyp em alýǵa muqtaj balalarǵa josparly túrde emdeýden ótýge keńes berildi. Sondaı-aq, tekserýden ótkizilgen pasıentterdiń ishinen aýyr jáne kúrdeli dertter anyqtalǵandary «UMC» korporatıvtik qorynyń Ana men bala ulttyq ǵylymı ortalyǵynda 2018 jyldyń basynda stasıonarlyq em alatyn boldy. Em aqysyz negizde tegin medısınalyq kómektiń kepildik berilgen kólemi sheńberinde kórsetiledi. Al densaýlyqtary keńinen zertteýdi qajet etetin balalar «UMC» korporatıvtik qorynyń Respýblıkalyq dıagnostıkalyq ortalyǵyna ambýlatorııalyq-dıagnostıkalyq tekserýge baǵyttaldy.