Ońtústik Qazaqtan oblysynda 2017 jylǵy 1 qazan aıyndaǵy kórsetkish boıynsha oblys halqynyń sany 2 914 054 adamdy qurady. Bul ótken jylǵy tıisti kezeńmen salystyrǵanda 1,2 paıyzǵa artqan. Nátıjesinde respýblıka boıynsha bizdiń oblys bala týý men tabıǵı ósim kórsetkishteri boıynsha 1-orynda.
Búgin bul týraly OQO óńirlik kommýnıkasııalar qyzmetinde ótken brıfıngte oblystyq statıstıka departamentiniń bastyǵy Aıdar Ábildabekov málim etti.
Onyń aıtýynsha, oblysta 2017 jylǵy qańtar-qyrkúıek aılaryn esepke alǵanda halyqtyń tabıǵı ósimi 47 917 adamdy quraǵan. Bul ótken jylǵa qaraǵanda 10,3 paıyzǵa kóbeıip otyr.
«Aǵymdaǵy jyldyń toǵyz aıynda oblys kóleminde bala týý kórsetkishi 59 061-di qurap respýblıka kóleminde alǵashqy oryndy enshiledi. Al qurylǵan otbasylarǵa kelsek, bıyl qyrkúıek aıyna deıin 15 myńnan astam jup nekege turǵan. Bul ótken jylmen salystyrǵanda 9,4 paıyzǵa kemip otyr», - dedi Aıdar Ahmetbekuly
Budan bólek, aǵymdaǵy jyldyń 9 aıynyń qorytyndysy boıynsha kóshi-qonmen oblysqa kelgen halyqtyń sany 19 800 adamdy quraǵan. Sonymen qatar, byltyrǵy jyldyń osy kezeńimen salystyrǵanda óńirge Qazaqstannyń basqa oblystarynan kelgenderdiń sany 2 esege kóbeıse, TMD elderinen kelgenderdiń sany 21,9 paıyzǵa ósip otyr. Al oblys ishindegi kóshi-qon 78 514 adamdy qurady. Sondaı-aq, oblystan qonys aýdarǵandardyń sany 32 myńnan asqan.