Almatyda VIII Halyqaralyq pıanıster baıqaýy ótti

Segizinshi ret uıymdastyrylǵan mý­­zy­ka maıtalmandarynyń jarysynda birinshi oryndy Sergeı Kım (Qazaqstan) men Rýstam Mýradov (Reseı) bólisti. Ekinshi oryn Jibek Qojahmetova (Qazaqstan) men Rýben Kozınge (Reseı) buıyrdy. Qazylar alqasy úshinshi dárejeli júldeni tapsyrmaýǵa sheshim qa­byldady. Tórtinshi júlde ıegeri As­qar Qulsharıpov (Qazaqstan) bol­dy.­ Besinshi dárejeli laýreattyq dıplomdy – Ernur Elaman ıelendi. Aıdos Baıbosyn (Qazaqstan), Maksım Maksımov (Qazaqstan) jáne Temirlan Beısenbaı (Qazaqstan) baıqaýdyń yntalandyrý syılyqtaryna laıyq dep tabyldy. Sondaı-aq aqshalaı syılyqtar baıqaýdyń ekinshi kezeńine qatysý úshin Anna  Antıpına (Qazaqstan) men Anna  Stekolshıkovaǵa  (Reseı) tabystaldy.

Birinshi oryndy jeńip alǵan Rýstam Mýradov: «Almatydaǵy pıanıster baıqaýy – bul ózińdi tanytýdyń keremet múmkindigi. Mundaı baıqaýlar mýzykantty shabyttandyrady. Baıqaýda básekelestik rýhty, júlde úshin jan­talas­ty sezinbedim. Eń aldymen, aýdı­torııa úshin oınadym. Mýzykant úshin tyńdarmanymen dál osylaı tildesý ǵajap áser syılaıdy», dedi.

Almatyda ótken VIII halyqaralyq pıa­nıster baıqaýy tek tyńdaýshylar úshin ǵana emes, qazylar alqasy úshin úlken mereke boldy. Qazylar alqasynyń aıtýynsha, baıqaýǵa mýzykant retinde bolyp-tolysqan oryndaýshylar qatysty. Olar repertýardy uıymdastyrýshylar usynǵan aýqymdy baǵdarlama aıasynda óz tańdaýlaryna saldy. Nátıjesinde, halyqaralyq mýzykalyq baıqaý baıqaý-festıvalge aınaldy.

Al qazylar alqasynyń quramynda halyq ártisi, Qurmanǵazy atyndaǵy QUK rektory, professor Jánııa Áýbákirova (Qazaqstan), P.I.Chaıkovskıı atyndaǵy MMK men Boston ýnıversıtetiniń pro­fessory Pol Nersesıan (Reseı), ha­lyq­aralyq baıqaýlardyń laýreaty Momo Kodama (Japonııa), halyqaralyq baı­qaýlardyń laýreaty Aleksandr Kor­santııa (Grýzııa-AQSh), Kemıýng ýnı­versıtetiniń professory Nan Hı Kım (Koreıa), Uly Vıtaýtas atyndaǵy ýnı­versıteti Mýzyka akademııasynyń dosenti Iýstas Dvarıonas (Lıtva) syndy tanymal da talantty mýzykanttar boldy. Olar baıqaýdyń barlyq kezeńinde óz ­tańdanystaryn jasyrmaı, sezimderine de­ erik berdi. Keıde ýaıymdaryn ashyq túr­de bildirip, tyńdarmandarmen birge qatysýshylardy qoldaýmen boldy. Qa­zylar alqasy men kópshiliktiń bul birligin qatysýshylar sezinip otyrdy. Jáne tyńdarmanǵa mýzyka saltanatyn syılaýǵa oń septigin tıgizdi.

Baıqaýǵa Qazaqstan, Reseı jáne Pol­shadan barlyǵy 19 jas oryndaýshy qa­tysty. Baıqaý úsh kezeńnen turdy. Úshinshi kezeńde – qatysýshylardyń óneri Dorıan Ýılsonnyń basshylyǵymen (AQSh) Qazaqstan Respýblıkasynyń Memlekettik akademııalyq sımfonııalyq orkestrimen súıemeldendi.

Aınash ESALI, «Egemen Qazaqstan»

ALMATY