Sozaqtyq sportshy 19 jastaǵy Qobylandy Orynbasarov Seýlde ótken gir tasyn kóterý sportynan álem chempıony atandy.
Al jattyqtyrýshysy Murat Serikbaev ardagerler arasyndaǵy jarysta álem chempıonatynyń kúmis júldesin ıelendi. Ońtústik Koreıa astanasy Seýl qalasynda ótken jarysqa álemniń 33 elinen 600-ge jýyq sportshy qatysty.
Dúbirli jarysta Qobylandy 73 keli salmaq dárejesinde baq synap, 32 keli gir tasyn uzyn sıkldy kóterýden 62 ret baǵyndyrdy. Al jattyqtyrýshysy M.Serikbaev 73 keli salmaq dárejesinde 24 kelini qos saıys boıynsha 131 ret kótergen. Alǵashqyda qazaq kúresimen aınalysqan Qobylandy osydan úsh jyl buryn gir tasyn kóterýdiń qyr-syryn úırene bastapty. Osy sportpen aınalysqan bir jyldyń ishinde jasóspirimder arasynda el chempıony atanyp, Latvııada ótken Evropa chempıonatynda kúmis júldege qol jetkizgen. Sondaı-aq, Aqtóbe qalasynda jasóspirimder arasynda álem chempıony atandy. Bıyl jastar arasynda el birinshiligin utyp, ulttyq quramaǵa múshe boldy.
Aıta ketelik, jastar, jasóspirimder arasyndaǵy álem chempıony Sozaq sportynyń tól týmasy Qobylandy Orynbasarov Almaty qalasyndaǵy Qazaq týrızm jáne sport akademııasynyń 3-kýrs stýdenti.
Ǵalymjan ELShIBAI, «Egemen Qazaqstan»