Jýyrda Reseıdiń Sankt-Peterbýrg qalasynda VI halyqaralyq mádenı forým ótti. Jıynǵa TMD, Eýropa, Azııa, Latyn Amerıkasy men Afrıka elderinen halyqaralyq uıymdardyń, iri mádenıet mekemeleriniń basshylary, kórnekti qoǵam qaıratkerleri, mádenıet salasynyń ókilderi qatysty. Aýqymdy jıynda elimiz «qonaq dárejesindegi el» retinde Ermıtajdyń bas shtaby alańynda baspasóz máslıhatyn ótkizdi.
Oǵan Mádenıet jáne sport mınıstri Arystanbek Muhamedıuly, «Astana-Mıýzıkl» teatrynyń dırektory Ashat Maemırov, «Qasıetti Qazaqstan» ǵylymı-zertteý ortalyǵynyń dırektory Berik Ábdiǵalıuly jáne Natalıa Sas atyndaǵy respýblıkalyq balalar men jasóspirimder orys teatrynyń dırektory Nadejda Gorobes qatysyp, forým qonaqtaryn qoǵamdyq sanany jańǵyrtýǵa qatysty eldegi birqatar jobalarmen tanystyrdy.
Elimizdiń kıeli jerleriniń jol kartasyn qurýǵa baǵyttalǵan «Qasıetti Qazaqstan» jobasymen osy attas ǵylymı-zertteý ortalyǵynyń dırektory Berik Ábdiǵalıuly tanystyrdy. «Búgingi tańda biz myńǵa jýyq nysandy anyqtadyq. Biz tek kıeli, qasıetti jerlerdi ǵana anyqtap qoımaı, soǵan baılanysty týyndaǵan ańyzdardy da jınaımyz, ınteraktıvti kartalar jasaımyz. Munyń bári týrısterdi tartý, búkil álemge bizdiń muramyzǵa qyzyǵýshylyq týdyrý úshin jasalady», dedi ol.
Al Qazaqstan teatrlarynyń damý deńgeıin Nadejda Gorobes baıandady. «Elimizdiń teatrlarynda barlyq repertýarlar qarjylandyrylady. Munda ár ult óziniń ónerin nasıhattaýǵa múmkindik alyp otyr», dedi ol.
Elimizdiń atynan Sankt-Peterbýrgke barǵan delegasııa VI Halyqaralyq mádenı forýmǵa óz baǵdarlamalaryn usyndy. Mysaly, 16 qarasha kúni Mıhaılov teatrynyń sahnasynda «Astana Balet» pen «Qazaqkonsert» ujymdary birigip gala-konsert ótkizdi. «Uly dala murasy» atty horeografııalyq mınıatıýralar men ulttyq naqyshtaǵy balet fragmentteri kórsetildi. «Mahabbat. Joǵaltý. Qorqynysh» baleti, Edıt Pıaf, Sharl Dıýmon, Jak Breldiń mýzykalyq áýeni tanystyryldy. Sondaı-aq merekelik keshte etno-folklorlyq «Nomad» ansambli elimizdiń ulttyq dástúrli mádenıetin tanystyrdy.
Al «Manej» ortalyq kórme zalynda «Qazaqfılm» kınostýdııasy Erlan Nurmuhambetovtiń «Jańǵaq tal» týyndysyn usyndy. Oǵan aýylda ómir súrip jatqan qarapaıym adamdardyń taǵdyrlary ózek bolǵan. Rejısserdiń aýyl tirshiligin ázil-qaljyńmen órnektegen bul kınokartınasy Ońtústik Koreıadaǵy 20-shy Pýsan halyqaralyq kınofestıvaliniń «Jańa aǵym» seksııasy boıynsha bas júldege ıe bolǵanyn, sondaı-aq byltyr Fransııada ótken XXII halyqaralyq Azııa kınofestıvalinde eki birdeı júldege laıyq dep tanylǵanyn aıta ketsek te artyq bolmas.
Sankt-Peterbýrgte ótken forým barysynda Qazaqstan men Reseıdiń mádenı yntymaqtastyq salasyndaǵy qarym-qatynasynyń bekem ekeni baıqaldy. О́ner adamdary arasyndaǵy tanystyq, jańa jobalardy birigip jasaý syndy qarym-qatynastar ónerge serpin beretini anyq. Bul oraıda «28 Panfılovshylar» fılmin túsirýdegi yntymaqtastyqqa baılanysty elimizdiń Mádenıet jáne sport mınıstriniń reseılik áriptesi Vladımır Medınskııge alǵysyn bildirýi de osy forým sheńberinde júzege asty. Jalpy mundaı deńgeıdegi forýmdardyń birlesken jańa jobalardy júzege asyrýdyń taptyrmas múmkindik alańy ekeni de anyq.
Aıgúl SEIIL, «Egemen Qazaqstan»