Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaev Qaraǵandy oblysynda jumys saparymen boldy. Úsh kúnge sozylǵan sapar sheńberinde ol aımaqtaǵy áleýmettik nysandarda, memlekettik mekemelerde bolyp, jumys barysymen tanysty.
Alık Jatqambaıulynyń jumys sapary Osakarov aýdanynan bastaldy. Aýdan ortalyǵyndaǵy emhanaǵa, Halyqqa qyzmet kórsetý ortalyǵy, kóshi-qon polısııasy qyzmeti, emtıhandyq-tirkeý bólimi jáne memlekettik kirister basqarmasyna bardy. Emhanada tóraǵanyń orynbasary mekeme kórsetetin qyzmet kólemine nazar aýdardy. Atalǵan nysan jergilikti turǵyndarǵa 12 túrli qyzmet usynyp otyr. Bul qyzmetterdi júzege asyrýda jańashyl tehnologııalardy qoldanýǵa basa den qoıylǵan. Elektrondy úkimet, ıaǵnı «e-gov» arqyly jumys júrgizilýde. Bul júıe emhanada úsh jyldan beri qolǵa alynýda. Munda kórsetiletin qyzmetter tizimi týraly aqparat alyp, soǵan sáıkes yńǵaıly ýaqytta dáriger kómegine júginýge bolady.
Basqarma jumysyna qanyqqan tóraǵanyń orynbasary qyzmet barysyn ońtaılandyrý boıynsha birqatar másele taqyrybynda sóz qozǵady. Ǵımarat aýdanynyń tıimdi paıdalanylmaı otyrǵandyǵyn synady. Naqty aıtqanda basqarma basshysy dárethana, jýynatyn bólmesi, qosymsha shyǵý esigi bar demalys bólmesin jabdyqtaǵan. Mundaı eskertýlerdi Alık Jatqambaıuly sapar barysynda barǵan Temirtaý, Shahtınsk qalalarynyń memlekettik kirister basqarmalarynyń basshylaryna da aıtty.
Jumys sapary Temirtaý qalasynda jalǵasty. Memlekettik qyzmetter sapasyn saraptaý maqsatynda shahardaǵy mekemelerge barǵan Alık Jatqambaıuly qala aktıvimen kezdesti. Tuńǵysh Prezıdenttiń tarıhı-mádenı ortalyǵynda ótken bul jıynda sybaılas jemqorlyqqa qarsy kúres baǵytyndaǵy sharalar talqylandy.
– Qala aktıvimen kezdespes buryn birqatar memlekettik mekemeniń jumysyna kóz jetkizgendi jón kórdik. Keleshekte joıylýy tıis kemshilikter bar. Biraq jalpy alǵanda, jumys jaqsy uıymdastyrylǵan. Búginde Qazaqstan qoǵamy korrýpsııadan ada zamanaýı quqyqtyq memleket qurýǵa kúsh salýda. Turǵyndardyń shynaıy aqparatqa qoljetimdiligin qamtamasyz etý maqsatynda elektrondy úkimet júıesi engizildi. Búginde qazaqstandyqtar bul múmkindikterdi keńinen paıdalanýda. Qazirgi tańda elimizdegi barlyq memlekettik qyzmetterdiń 47 paıyzy elektrondy formatta júzege asyrylady. Bul – óte joǵary kórsetkish. Aldaǵy jyldarda elektrondy qyzmet kórsetilý mejesin 90 paıyzǵa jetkizý josparlanýda. Qalǵan 10 paıyzy servıstik uıymdar, memlekettik korporasııalar arqyly atqarylady, – dedi Alık Jatqambaıuly.
Jıynda sybaılas jemqorlyq derekteri boıynsha qamaýǵa alynǵan sheneýnikter týraly aqparat berildi. Korrýpsııamen kúres amaldary týraly áńgime órbitken tóraǵanyń orynbasary aldyn alý sharalarynyń tıimdiligi týraly aıtty. Kelesi kúnderi Alık Shpekbaev Qaraǵandy qalasyndaǵy turǵyn úı qatynastary bólimine, áleýmettik tólemder jónindegi vedomstvoaralyq esep aıyrysý ortalyǵyna, Halyqqa qyzmet kórsetý ortalyqtaryna, Dostyq úıine, №3 qalalyq emhanaǵa, Qazybek bı aýdandyq memlekettik kirister basqarmasyna jáne basqa da mekemelerge bardy. Qaraǵandy qalasynan keıin Saran, Shahtınsk qalalary men Abaı aýdanynda boldy. Sol kúni keshke Alık Shpekbaev oblys ákimi Erlan Qoshanovpen birge Qaraǵandy qalasyndaǵy mamandandyrylǵan Halyqqa qyzmet kórsetý ortalyǵynyń jumysymen tanysty. Sondaı-aq oblystyq sybaılas jemqorlyqpen kúres komıssııasynyń otyrysyna qatysty.
Mıras ASAN, «Egemen Qazaqstan»
Qaraǵandy oblysy