Ortalyq kommýnıkasııalar qyzmetinde «Azamattyq qorǵaý organdarynyń qysqy kezeńge ázirligi» taqyrybynda baspasóz máslıhaty ótti. Jıynǵa Ishki ister mınıstriniń orynbasary Iýrıı Ilın qatysyp, salanyń jaı-kúıinen BAQ ókilderin habardar etti.
Iý.Ilınniń pikirinshe, búgingi tańda mınıstrlikte qysqy kezeńdegi tótenshe jaǵdaılarǵa baılanysty jaǵdaı qıyndaǵan sátte jalpy sany jeke quramnan 12 myńnan astam adam jáne shamamen 2 myń birlik tehnıkadan turatyn avarııalyq-qutqarý bólimsheleriniń kúshteri men quraldarynyń toby qurylǵan.
Komandalyq-shtabtyq kólikter men ótimdiligi joǵary dóńgelekti jáne shynjyr tabandy mashınalardy, avarııalyq-qutqarý jáne mamandandyrylǵan áskerı tehnıkalar qysqy jaǵdaılarda paıdalanýǵa ázirlikke keltirilgen. Sondaı-aq jeke quramdy tótenshe jaǵdaı aımaǵyna jedel jetkizý jáne zardap shekken halyqty evakýasııalaý úshin «Qazavıaqutqarý» AQ-nyń tikushaqtary da kezekshilik rejimde saqadaı saı daıyn tur.
«Qys-2017» oqý-jattyǵýy aıasynda tótenshe jaǵdaı kezindegi is-qımyldar is júzinde pysyqtaldy. Aǵymdaǵy jylǵy 9-10 qarashada oqý-jattyǵý barysynda qysqy jaǵdaılardaǵy is-qımyldarǵa qurylymdar men qyzmetterdiń ázirlik deńgeıi, qulaqtandyrý jáne baılanys júıesiniń, energııa, gaz, jylý, sýmen jabdyqtaý jáne kólik kommýnıkasııalar júıeleriniń jumysy tekserildi. Sonymen qatar halyqaralyq jáne respýblıkalyq mańyzy bar avtojoldarda 40 medısınalyq-qutqarý pýnkti jabdyqtalǵan. Olar shuǵyl medısınalyq kómek kórsetý, zardap shekkenderdi tasymaldaýmen qatar, jylytý pýnktteri retinde de paıdalanylady», dedi Iý.Ilın.
Iý.Ilın óz sózinde respýblıkalyq mańyzy bar avtomobıl joldaryndaǵy qar basatyn ýchaskelerdiń jalpy uzyndyǵy 23 myń shaqyrymdy, jergilikti mańyzy bar joldarda 12 myń shaqyrymdy quraıtynyn da tilge tıek etti.
«Qazirgi kezge deıin respýblıkalyq avtojoldarda qar basatyn 964 ýchaske anyqtaldy. Onda 35 myń qardan qorǵaý qalqany ornatylyp, avtomobıl joldarynyń kólik magıstraldaryndaǵy eńister men asýlarǵa 160 myńnan astam tekshe kóktaıǵaqqa qarsy materıaldar tóseldi. Osylaısha jol paıdalaný qyzmetteri 1 088 birlik ınjenerlik jáne qar tazalaıtyn tehnıkalar daıyndalyp, 503 jylý pýnkti iske qosyldy», dedi ol.
Raýan QAIDAR, «Egemen Qazaqstan»