Jańa jyl jaqyndap keledi. Jaqyndaǵan saıyn bir kúndik qyzyq úshin júz jyldyq shyrshalardy zańsyz qıyp, satýshylar qatarynyń kóbeıe túsetini de belgili. Osy rette óńirdiń orman sharýashylyǵy qyzmetkerleri aımaqtaǵy shyrshalardy, onyń ishinde jas óskinderdi óz baqylaýlaryna aldy.
Qazir Tarhan ormanshylyǵyndaǵy stasıonarlyq bekette quqyq qorǵaý organdarymen birlese otyryp táýlik boıy kezekshilik qoıylǵan.
Budan bólek jas óskinderdiń zańsyz kesilýine jol bermeý úshin arnaıy 5 mobıldi top qurylǵan. «Bıyl 1 aqpanynan bastap qylqan japyraqty aǵashtardy qııýǵa tyıym salynǵandyqtan jańajyldyq shyrshalardy daıyndaý kólemi edáýir azaıdy. Shyrshalar tek mádenı-buqaralyq sharalarǵa oblystyq tabıǵı resýrstar basqarmasynyń ruqsatymen zań aıasynda beriledi», deıdi О́skemen orman sharýashylyǵynyń ormandy qorǵaý jáne saqtaý jónindegi ınjeneri Nurlan Sáttibaev.
Jańajyldyq shyrshalardy tasymaldaýshylarda tıisti qujattarynyń bolýy da qatań baqylaýǵa alynǵan. Ormandy zańsyz otaýshylarǵa qoldanylar jaza kúsheıtilgen. Máselen, zańsyz aǵash kesýshilerge – 300, al úıine shyrsha ornatýǵa úıir jandarǵa 15 aılyq eseptik kórsetkishke deıin aıyppul qarastyrylǵan.
Azamat QASYM, «Egemen Qazaqstan»
Shyǵys Qazaqstan oblysy