Nebári 25 jasynda erlik kórsetip, beıbit kúnniń batyry atanǵan azamattyń biri – Qyzylorda oblysy Shıeli aýdandyq ishki ister bóliminiń burynǵy ýchaskelik polısııa ınspektory, polısııa leıtenanty Talǵat Qozybaev. Ol jóninde qysqa metrajdy derekti fılm túsirildi. Ol erlikpen qaza tapqan soń, el Prezıdentiniń Jarlyǵymen II dárejeli jaýyngerlik «Aıbyn» ordenimen marapattaldy. Búginde onyń atynda eldi meken men kóshe bar.
Jaqynda Onomastıkalyq komıssııanyń sheshimimen Syrdarııa aýdany O.Málibaev aýylyndaǵy №131 orta mektebine polısııa leıtenanty Talǵat Esentaıuly Qozybaevtyń esimi berildi. Al 2007 jyly mektep aýlasynda eskertkish ornatylǵan bolatyn. Onyń avtory – elimizge belgili músinshi Jarken Ysmaǵulov.
Bári keshegi kúngideı esimde. 2003 jylǵy naýryz aıynyń 8-inen 9-yna qaraǵan túni, saǵat 03-te Talǵat jaldap turatyn páterine demalýǵa kelgende, aýyl azamaty aýyldasynyń ózin uryp, dene jaraqatyn salǵandyǵy týraly aryzdanady. Jábirlenýshiden qyzmet bólmesinde túsinik alyp otyrǵanda aryzyn qaıtyp alýdy talap etken qarýly qylmysker jábirlenýshini atýǵa árekettengende oǵan qarsy umtylyp, onyń qarýyn tartyp almaq bolady. Oǵan oq tıip qulaǵanda, qylmysker myltyqty qaıta oqtap, qashpaqqa árekettenedi ári jábirlenýshini ekinshi ret atpaqqa oqtalady. Al Talǵat jábirlenýshini denesimen qorǵap, myltyqty tartyp almaqshy bolǵanda, oǵan ekinshi ret oq tıedi. Keıin saraptama qorytyndysy kórsetkendeı, Talǵattyń ólimine onyń betine tıgen, bet súıekterin qatty zaqymdaǵan ekinshi oq sebep bolypty.
Sońǵy jyldary Talǵatty eske alýǵa arnalǵan is-sharalar ótkizilip keledi. Sonyń eń bastysy – Tartoǵaı aýylyna kireberistegi uzyn kóshelerdiń birine onyń esimi berilgeni.
Talǵat Qozybaevqa arnalǵan taǵy bir úlken is-shara – ata-anasy Esentaı aǵa men Shynar apaıǵa Elbasy N.Nazarbaevtyń jarlyǵymen II dárejeli «Aıbyn» ordeniniń tapsyrylýy. Bul shara áýeli oblystyq ishki ister basqarmasynyń úlken zalynda bastaldy. Esentaı aǵaǵa nagradany sol kezdegi oblys ákimi S.Nurǵısaev saltanatty jaǵdaıda tapsyrdy. Al Talǵatty eske alý sharasy Syrdarııa aýdanynyń Málibaev atyndaǵy aýylda Tereńózek kenti ákimshiliginiń bastaýymen ótkizildi. Jańadan salynǵan mektep aldyna ornatylǵan Talǵattyń eskertkishin sol kezdegi oblys ákimi M.Qul-Muhammed ashqan edi.
Husaıyn QORAZBAEV, Qyzylorda oblystyq ishki ister departamenti zań bóliminiń basshysy