Densaýlyq saqtaý salasyn sıfrlandyrý týraly búgin Úkimettiń baspasóz ortalyǵynda ótken baspasóz konferensııasynda densaýlyq saqtaý vıse-mınıstri Alekseı Soı aıtyp berdi.
Densaýlyq saqtaýdy sıfrlandyrý Memleket basshysynyń «Qazaqstannyń úshinshi jańǵyrýy: jahandyq básekege qabilettilik» Joldaýy aıasynda júzege asyrylýda, oǵan qosa «Sıfrlyq Qazaqstan» memlekettik baǵdarlamasynyń jobasymen tolyq sáıkestendirý qamtamasyz etildi.
Sıfrlyq densaýlyq saqtaýdyń maqsatty úlgisi naýqastar týraly málimetter, syrqatnamalar bar biryńǵaı aqparattyq keńistik qurýdy kózdeıdi. Naýqastar elektrondy densaýlyq pasporty, densaýlyq saqtaýdyń elektrondy qyzmetterine qoljetimdilik arqyly jeke basynyń densaýlyǵy týraly málimetke qol jetkize alady jáne medısınalyq qyzmetter alý sapasy týraly keri baılanysty usynady.
Dáriger, óz kezeginde, óz naýqastarynyń densaýlyǵy týraly shoǵyrlandyrylǵan málimetke qoljetimdiliktiń arqasynda qashyqtyqtan keńes bere alady. Medısınalyq uıymdar óz jumysynyń reıtıngin eskeredi, ahýaldyq panel men ındıkatorlarǵa qoljetimdilikke ıe bolady, bul qyzmetterdi usyný sapasyn ýaqytyly arttyrýǵa múmkindik beredi. Sondaı-aq Áleýmettik medısınalyq saqtandyrý qorynyń jáne qoǵamdyq densaýlyq qyzmetiniń jumysy avtomattandyrylady.
Vıse-mınıstr sondaı-aq óńirlerde júrgizilip jatqan jumystar týraly aıtty. Qazirgi ýaqytta óńirlerde densaýlyq saqtaýdy sıfrlandyrýdyń úsh úderistik ındıkatory ólshenedi: medısınalyq aqparattyq júıelerdi engizý, kompıýterlik tehnıkamen jabdyqtaý jáne densaýlyq saqtaý uıymdarynyń ınternet jelisine qoljetimdiligin qamtamasyz etý.
«1 qazandaǵy jaǵdaı boıynsha dárigerler men orta medısınalyq qyzmetkerlerdiń kompıýterlik tehnıkamen jabdyqtalýy 78,4% qurady. 2018 jylǵy 1 qańtarǵa 85%, 2019 jyldyń basyna qaraı 100% kórsetkishke qol jetkizý josparlanǵan», — dep atap ótti A. Soı.
Alekseı Soı sondaı-aq densaýlyq saqtaýǵa Watson for Oncology jasandy ıntellektti pılottyq engizý týraly jýrnalısterdiń suraqtaryna jaýap berdi. 14 qyrkúıekte QR DSM men IBM kompanııasy arasynda yntymaqtastyq týraly memorandýmǵa qol qoıyldy, onyń aıasynda densaýlyq saqtaýǵa jasandy ıntellektti — Watson for Oncology pılottyq engizý josparlanǵan. Qazirgi ýaqytta memorandým aıasynda pılottyq jobany ótkizý boıynsha jol kartasy ázirlenýde.
Aıtylǵan aqparatqa sáıkes, jasandy ıntellekt naýqastyń syrqatnamasyn jedel zertteı alady jáne sońǵy medısınalyq jetistikter men ǵylymı jarııalanymdardy eskere otyryp, dárigerlerge emdeýdiń áldeqaıda tıimdi ádisterin usyna alady. Engizgen sátten bastap onkologııalyq aýrýǵa shaldyqqan 100 myńǵa jýyq naýqastyń syrqatnamalaryn taldaý josparlanǵan.
Vıse-mınıstr sondaı-aq Memleket basshysynyń 2018 jylǵy I toqsandaǵy tapsyrmalaryna sáıkes densaýlyq saqtaýdy sıfrlandyrý boıynsha Eýrazııalyq ekonomıkalyq odaqtyń arnaıy Forýmy ótkiziletinin jetkizdi.