Astanada «Din salasyndaǵy zańnama men quqyq qoldaný praktıkasyn jetildirý» taqyrybyndaǵy dóńgelek ústel ótti. Jıynǵa Din isteri jáne azamattyq qoǵam vıse-mınıstri Berik Aryn, BUU men Eýropadaǵy qaýipsizdik jáne yntymaqtastyq uıymy jáne birqatar mekeme ókilderi qatysty.
Dóńgelek ústel jumysyn ashqan Din isteri jáne azamattyq qoǵam vıse-mınıstri B.Aryn Qazaqstanda adam quqyqtary shektelmegenin, dinı birlestikterge jaǵdaı jasalǵanyn atap ótti.
«Eldegi din salasyndaǵy turaqtylyqty saqtaý, konfessııaaralyq kelisimdi jáne qoǵamdaǵy toleranttyqty nyǵaıtý, halyqtyń dinı ekstremızm ıdeologııasyna qarsy ımmýnıtetin qalyptastyrý jóninde túrli sharalar qabyldanyp keledi. Sondaı-aq, elde resmı tirkelgen dinı birlestikter men olardyń fılıaldarynyń qyzmetine qajetti múmkindikter qarastyrylǵan», dedi B.Aryn.
Vıse-mınıstr Din salasyndaǵy memlekettik saıasattyń 2017-2020 jyldarǵa arnalǵan tujyrymdamasyna toqtaldy. Onyń aıtýynsha, bul qujat memleket pen din arasyndaǵy qarym-qatynasty retteýge kómektesip, dinniń qoǵam aldyndaǵy rólin anyqtaýǵa qosar úlesi mol.
B.Aryn dóńgelek ústelge jınalǵandarǵa mınıstrlik tarapynan ázirlengen «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý týraly» Zańynyń jobasymen tanystyrdy. Onyń sózine súıensek, jańa zań jobasynda adam quqyqtaryn qorǵaıtyn jáne dindi ekstremıstik jáne destrýktıvti maqsatta paıdalanýdyń yqtımaldyǵyn tómendetýge baǵyttalǵan quqyqtyq normalar engizilgen. Sonymen qatar, B.Aryn mınıstrlik tarapynan atqarylyp jatqan sharalar jóninde áńgimelep berdi.
Din isteri jónindegi komıtet tóraǵasynyń orynbasary Erkin Ońǵarbaev zań jobasyn ázirleý barysynda dinı birlestikterdiń, úkimettik emes uıymdardyń jáne sarapshylardyń pikiri eskerilgenin sóz etti.
Zań jobasy sáıkes, adamnyń bet beınesin tumshalaıtyn, destrýktıvti ıdeologııalyq aǵymdardy nasıhattaıtyn kıim túrlerin kııýge jáne taratýǵa shekteý qoıý kózdelgen. Sondaı-aq, olardy buqaralyq aqparat quraldarynda jarnamalaýǵa tyıym salynady. Sonymen qatar, dinı birlestikterdiń qarjylyq ashyqtyǵyn qamtamasyz etý, dinı ekstremızm jáne terrorızmge qarsy is-qımyl tıimdiligine baǵa berý júıesin engizý, dinı qatynastar sýbektileriniń qyzmetine baqylaýdy kúsheıtý sekildi máseleler de qarastyrylǵan.
Jıynǵa qatysýshylar dinı ahýaldy retteýge arnalǵan jańa zań jobasyna qatysty birqatar máselelerdi talqylap, ony qabyldaý memleket pen konfessııalar arasyndaǵy qatynasty jetildirýge, dinı ekstremızm ıdeıasynyń taralýyna shekteý qoıatynyna senim bildirdi.
Abaı ASANKELDIULY,
«Egemen Qazaqstan»