Ulyq mereke qutty bolsyn!

Qurmetti musylman baýyrlar, otandastar! Mine, barsha musylman saǵyna kútetin Qur­ban aıt merekesine de jettik. Alla qa­lasa, 6 qarashadan bastap, shamasy kelgen ár musylman Alla razylyǵy úshin qurban shalyp, dinine, ımanyna adaldyǵy men shy­naıy yqylasyn bildiredi. Sol arqyly Ja­ratýshy ıemizdiń quzyrynda ózine laıyq dá­rejege qol jetkizedi. Ardaqty Paıǵam­bary­myz (s.ǵ.s.) hadıs sháripteriniń birinde: «Adam balasy qurban aıt kúninde (qurban shalyp) qan aǵyzýdan da súıikti eshbir ispen Alla Taǵalaǵa jaqyndaǵan emes» dep bul qulshylyqtyń mánin túsindirgen. Sondaı-aq taǵy bir hadısinde: «Kimde-kim múmkinshiligi bola tura qurban shalmasa, bizdiń namaz oqıtyn jerimizge jaqyndamasyn!» – dep eskertý jasaǵany da bar. Qurban shalýdyń ýaqyty qurban aıttyń birinshi kúni Aıt namazynan keıin bastalyp, aıttyń úshinshi kúni aqshamǵa az ýaqyt qal­ǵan­ǵa deıin jalǵasady. Úzir sebepterge baı­lanysty qurban aıt namazyna bara almaı qalǵan adamnyń, namaz oqyp bolatyndaı ýaqyt ótkennen keıin qurbanyn shala berýine bolady. Qurban aıty barsha musylmandar úshin úlken mereke. Onyń tarıhy sonaý Ibrahım Paıǵambardan bastaý alady. Sodan beri urpaqtan urpaqqa jalǵasa kelip, ardaqty Paıǵambarymyz Muhammed Mustafa (s.ǵ.s) ómir súrgen altyn ǵasyrda musylmandardyń Qııamet kúnine deıin atap ótetin eń ulyq eki merekeniń birine aınaldy. Ár jyl saıyn jer betindegi búkil musylman jurtshylyǵy osy Qurban aıt meıramyn erekshe kóńilmen merekelep keledi. Qazaq dalasynda da bul meıramnyń orny erekshe. Meıramǵa bir-eki apta qalǵannan bastap, búkil aýyl jurtshylyǵy osy meı­ram­dy óz deńgeıinde atap ótýdiń qam-qa­reketine kirisedi. Arapa kúni, ıaǵnı aıttan bir kún buryn aýyl ómiri tipti qarbalas. Aıttap kelgenderdiń aldyna jaıý úshin san túrli dámdi taǵamdarǵa toly mol dastarqannyń qyzý daıyndyǵy júredi. Bul búginge deıin úzilmeı jalǵasyn taýyp otyrǵan úrdis. Tipti dinimizdiń ózge qundylyqtary tura­lap, kenjelegen keńes kezeńiniń ózinde hal­qy­myz eki aıt merekesin ótkizip keldi. Al qazir, Allaǵa shúkir, elimiz de, dinimiz de táýel­siz. Bıyl ata-babalarymyz ańsap ótken azattyqtyń aq tańy atqanyna jıyrma jyl tolyp otyr. Sonyń qarsańynda memleketimizde qyrýar ıgilikti sharalar jasalyp ja­tyr. Solardyń basy-qasynda júrgen el­jan­dy azamattardyń barshasyna Alla Taǵala berekesin jaýdyrsyn dep tileımiz. Din sa­la­synda da osy az ýaqyt ishinde qanshama ıgi ister atqaryldy. Keńes kezinde Qazaqstanda bir de bir dinı oqý orny bolmaǵan bolsa, qa­zir «Nur-Múbárak» ýnıversıteti, ımam­dar­dyń bilimin jetildiretin Islam ınstıtýty, sondaı-aq oblystarda 10 dinı medrese ha­lyq­qa qyzmet kórsetýde. Táýelsizdikke deıin búkil elimizde nebári 68 ǵana meshit bolsa, qazir onyń sany 2500-den asyp jyǵylady. Máýlit, Qadir túni, ózge de dinı keshter ult­tyq merekege aınalyp keledi. Táýel­siz­di­gi­mizge deıin qajylyq jasaýǵa saýsaqpen sanarlyq qana otandastarymyz barǵan bolsa, búginde ár jyly 4000-daı baýyrlarymyz osy paryzdy atqaryp otyr. Qysqasy, táýelsizdigimizdiń jıyrma jyldyǵy ata dinimiz úshin de berekeli bolǵany sózsiz. Elbasymyz Nursultan Ábishuly dinimiz­diń órkendeýine de jaǵdaı jasap, musylman jurtshylyǵy dinı meıramyn merekelesin dep Qurban aıttyń alǵashqy kúnin resmı demalys retinde jarııalady. Endigi kezekte Qazaqstannyń búkil qa­lalary, aýdandary, óńirleri men shaǵyn aýyl-aımaqtaryna deıin osy aıt merekesiniń erekshe kóńil kúıin qalyptastyryp, ulttyq, búkil halyqtyq deńgeıge kóterýimiz qajet. Jaǵdaıy jetkenderdiń bári qurban shalsa, onyń eti turmysy tómenderge taratylsa, halqymyz arasynda aýyzbirshilik pen syı­lastyq ta artqan ústine arta beredi. Aıt kelgende ár otbasynda qýanbaıtyn, shat­tan­baıtyn kisi qalmaýy lázim. Besiktegi baladan tórdegi eresekterge deıin barsha otan­das­ta­rymyzdy aıt meıramyn jyl saıyn saǵyna kútetin deńgeıge jetkizýge tıispiz. Balalarǵa arnaıy oıynshyqtar men syılyqtar ta­ratýdy uıymdastyrsaq, bul mereke olardyń da saǵyna kútetin meıramyna aınalary anyq. Jaqyn-jurattarymyzǵa da syı-syıapat, tartý-taralǵyny dál osy aıt kún­derinde kóbirek jasaýdy ádetimizge aınal­dyrǵan durys. Sonda jerdegiler osyndaı ıláhı merekeni toılap, máz-máıram bolyp jatqanda, kóktegi perishteler de musylman jurtshylyǵynyń birlik-yntymaǵyna tilektes bolatyny sózsiz. Meshitterde Aıt namazyn oqyp shyqqan soń, úı-úılerdi aralap, jaqsy-jaqsy ımanı áńgimeler aıtyp, marqumdarǵa Quran baǵyshtaý da saýapty is. Sóz sońynda el-jurtyma tilerim, barshamyzdyń shalǵan qurbandyqtarymyzdy Alla Taǵala qabyl etsin! О́ziniń sheksiz meıirimimen sansyz mol saýaptardan jazǵaı! Elimizdi árdaıym birlik-yntymaqtan aıyr­ma­syn! Táýelsizdigimizdiń 20 jyldyǵy da qutty da baıandy, máńgilik bolsyn! Ámın. Sheıh Ábsattar qajy DERBISÁLI, Qazaqstan musylmandary dinı basqarmasy jáne Orta Azııa Múftıler keńesiniń tóraǵasy, Bas múftı.