Semeıde «Tilge qurmet – elge qurmet» atty ózge ult ókilderine arnalǵan oblystyq bilim baıqaýynyń qatysýshylary «Latyn qaripti kitaptar» atty kitap kórmesine arnaıy keldi.
Shara barysynda sırek basylymdar qoryndaǵy saqtalǵan 1929-1940 jyldar aralyǵynda jaryq kórgen basylymdar tanystyrylyp, sholý júrgizildi.
– Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasy aıasynda osy kórmeni ózge ult ókilderine usynyp otyrmyz, – dedi Shyǵys Qazaqstan oblystyq Abaı atyndaǵy ámbebap kitaphananyń dırektory Gúlnar Jigitbaeva, tatar, ózbek, orys, belorýs, koreı ultynyń ókilderi shara barysynda sırek basylymdar qorynda saqtalǵan latyn qarpinde jaryq kórgen kitaptarmen tanysty.
– Munda 1929-1940 jyldary basylǵan álippeni kórip tań-tamasha qaldym, – deıdi Oksana Grebenchýk, tipti jaratylystaný, hımııa, anatomııa, jaǵrafııa sııaqty pándik kitaptar men Abaı Qunanbaev, Sultanmahmut Toraıǵyrov, Muhtar Áýezov, Ilııas Jansúgirov, Beıimbet Maılın, Sábıt Muqanovtardyń latyn qaripterimen terilgen shyǵarmalary bar eken. Qazaq halqyna latyn qarpi burynnan tanys ekendigin baıqadym.
T.Amanov atyndaǵy №16 mektep oqýshylary da arnaıy kelip, kórmeni tamashalady. Olardyń nazaryna Á.Ermekovtiń «Uly matematıka kýrsy» (1935 j.), A.Mamytulynyń «Densaýlyq jolynda» (1935 j.), T.Shonanulynyń «Orystarǵa qazaq tilin úıretkish» (1931 j.), «Tańqybaı» (I.Jansúgirov), «Quq: satıralyq áńgimeler jınaǵy» (1935 j.) sııaqty latyn tilindegi basylymdar usynyldy.
Raýshan NUǴMANBEK, jýrnalıst
SEMEI