Memleket basshysy Nursultan Nazarbaev belgili ǵalym, kórnekti qoǵam qaıratkeri, halqymyzdyń maqtan tutar aıaýly perzentteriniń biri Salyq Zımanovtyń ómirden ozýyna baılanysty marqumnyń otbasy men týǵan-týystaryna kóńil aıtyp, jedelhat joldady.
«Salyq Zımanov otandyq zań ǵylymynyń damýyna, quqyqtyq memlekettiń qalyptasýyna, táýelsiz elimizdiń órkendeýine ólsheýsiz úles qosqan zııaly tulǵa edi. Ol kisi shyn máninde kisilik pen danalyqtyń úlgisindeı, ádildiktiń tarazysyndaı abyz aqsaqalymyz bolatyn. Adamgershilik qasıetteri mol, jany jaısań, júregi kirshiksiz, abzal azamattyń elge sińirgen eńbegi men jarqyn dıdaryn halqymyz árdaıym júreginde saqtaıdy dep senemin. Onyń ǵylymdaǵy mol murasy men ǵıbratty ǵumyry keıingi urpaqqa úlgi bolýy tıis. Marqumnyń topyraǵy torqa, jany jannatta bolsyn», – delingen jedelhatta.