О́z anań boıyńa bergen qýat, tabıǵat syılaǵan talantpen ushtassa, onda adamnyń baǵy janyp, juldyzy bıikten kórinedi. Qanatty qyrandaı kókke samǵap, kórgen kózdi de súısindiredi. Mine, sondaı talantty azamattardyń qatarynan tabylyp kele jatqan Qazaqstannyń halyq ártisi, Q.Qýanyshbaev atyndaǵy memlekettik akademııalyq qazaq mýzykalyq drama teatrynyń kórkemdik jetekshisi, «Qurmet» jáne «Parasat» ordenderiniń ıegeri, professor, teatr jáne kıno rejısseri Talǵat Temenovtiń ár jyldardaǵy jetistigi jurtty súısindirýmen keledi.
Ol jaqynda ǵana «Mádenıet qaıratkeri» atalymy boıynsha «Altyn adam» qurmetti ataǵyna laıyq dep tanyldy. Bul marapat kúni keshe ǵana Almatydaǵy Abaı atyndaǵy memlekettik akademııalyq opera jáne balet teatrynda tabys etildi. Osy arada bul ataq týraly az-kem málimet berer bolsaq, «Altyn adam» festıvali – «Jyl tańdaýy» halyqaralyq mártebege ıe jáne TMD memleketteriniń 5 elinde: Qazaqstan, Qyrǵyzstan, О́zbekstan, Ýkraına, Belorýssııada ótip keledi. «Altyn adam» ulttyq jobasy – saıasattandyrylmaǵan táýelsiz joba bolyp sanalatynyn da eske sala keteıik.
Tabıǵat bergen talantymen óz otandastarymyzdy emes, álem jurtshylyǵynyń da nazaryn aýdaryp, kórkem dúnıelerimen kóptiń kóńilinen shyǵa alǵan Talǵat Temenovtiń «Adamdar arasyndaǵy bóltirik» atty tolyq metrajdy kórkem fılmi Maındaǵy Frankfýrt qalasynda ótken 15 halyqaralyq kınobáıgesiniń Gran-prı, Italııada «Kúmis aıý» júldesine sol sekildi Portýgalııada ótken halyqaralyq kınofestıvaldyń arnaıy júldesine ıe bolǵan edi.
О́zi ssenarııin jazyp, ózi qoıǵan kórkem fılmderi qatarynda «Shańyraq», «Qaıdasyń sen, Chapaı?», «Toro», «Qyzǵysh qus», «Mahabbat beketi» bolsa, «Alma baǵy», «Kógildir taksı» (S.Smataevpen birigip), «Aqqýdyń kóz jasy» syndy pesalar jazyp, sahnalandy. Talǵat Dosymǵalıuly tek kıno jáne teatr rejısseri bolýymen qatar qalyń jurtshylyqqa jazýshy retinde de jaqsy tanys. Onyń «Qaıyrly tań», «Gúlnaz», «Oı jasyn» atty povester men áńgimeler jınaǵy oqyrmandarynyń iltıpatyna bólenip keledi.
Rejısser 2017 jyly Sh.Aıtmatovtyń «Qyzyl oramaldy shynarym» atty shyǵarmasyn sahnalady. «Aqqýdyń kóz jasy» dep atalǵan spektakli I Dúnıejúzilik «Astana» teatr festıvalinde kórsetildi. Bul eńbek kelesi jyly Londonda ótetin Sh.Aıtmatovtyń 90 jyldyq mereıtoıyna arnalǵan halyqaralyq óner báıgesine shaqyrtý alyp otyr. Al «Bizdiń qalanyń kishkentaı hanzadasy» kınokartınasy prokatqa shyǵyp, Iаltada, Qazanda, Shanhaıda ótken halyqaralyq kınofestıvalde kórsetiledi. О́ner tarlany álemdik óner qaıratkerleriniń qatarynda jaryq kórgen týyndylardy saraptaıtyn qazylar alqasynyń quramynda bolyp, óziniń bilim-biligin tanytyp júr.
Sózimiz jalań bolmas úshin mysal keltirer bolsaq ol Halyq Qaharmany Á.Mámbetovtiń 85 jyldyǵyna arnalǵan «Sahnadan sálem!» V halyqaralyq teatr jáne VI etnıkalyq teatrlar, Kaspıı jaǵalaýy elderiniń teatr festıvalderine qazylar alqasyna tóraǵalyq etti. Qyrǵyzstandaǵy «Art-Ordo» halyqaralyq teatr festıvalinde qazylar alqasynyń múshesi, Halyqaralyq Eýrazııa kınofestıvalinde negizgi atalym boıynsha sarapshylar alqasynyń quramynda qyzmet etti. Bir sózben aıtqanda, til qudiretin uǵynyp, sóz ustaǵan, kıno men teatr álemin jetik meńgerip, kórkem týyndylar bergen, tabıǵatqa tartyp týǵan Talǵat Temenovtiń de qazaq ónerinde ózindik qoltańbasy bar. Ony oqyrmandar da, kórermender de baǵalap keledi.
Súleımen MÁMET,
«Egemen Qazaqstan»