Aqtóbelik kásipker Erbol Baıjarqynov stýdentterge arnalǵan tegin ashana ashty.
Stýdenttik bıletpen kelgen adam bul ashanada tańǵy jáne túski asty tegin ishe alady. 50 orynǵa arnalǵan atalǵan kafe-ashana aptanyń alty kúninde tańerteńgi 7.00 den keshki saǵat 17.00-ge deıin jumys isteıdi. Munda bir kúnde bir myńǵa deıin stýdent aýqattanyp shyǵa alady. Sonymen birge materıaldyq jaǵdaıy joǵary stýdentter úshin aqyly dastarhan máziri túrleri de bar.
Tegin tamaqpen birge «Nurdáýlet» jeke kásiporynnyń ıesi E.Baıjarqynov ár senbi saıyn osy ashana ǵımaratynda stýdentterdiń aqtóbelik bıznesmendermen kezdesý keshterin uıymdastyrýdy jolǵa qoıǵan. Olar osy kezde bolashaq maman ıelerine bıznesti qalaı bastaǵandary týraly aıtyp, átájirıbelerimen bólisedi.
"Mundaǵy meniń qaǵıdam – búgingi stýdentterdiń arasynan keıin ózine de, eline de tabys, paıda jáne kiris keltire alatyn túlekter shyǵatyny anyq. Meıli kóp bolmaı-aq qoısyn, tipti on saýsaqtyń sanyndaı-aq bolsynshy. Osynyń ózi jetedi. Mol tabysqa qol jetkizgen kezde olar ózgelerge kómektesý qajettigin uǵynsa eken degen oımen osy isti qolǵa aldym. Múmkin bireý túsiner, bireý túsinbes. Qaıyrymdylyq jasaýdyń da adamǵa syılaıtyn sózben aıtyp jetkizgisiz óz lázzaty bolady. Men sony sezinip júrmin", dedi Erbol Baıjarqynov.
Temir Qusaıyn,
"Egemen Qazaqstan"
AQTО́BE