Kompıýterlik anımasııa janrynda jumys istep kele jatqan Pixar stýdııasynyń kez-kelgen fılmi kópshiliktiń yqylasyna bólenip qana qoımaı, ár jyldary Oskar syılyǵynyń júldegeri bolýymen daralanyp keledi. Kompanııanyń bul jolǵy kezekti týyndysy «Kokonyń qupııasy» anımasııalyq fılminde meksıkalyqtardyń ejelden kele jatqan «ólgender kúni» atty dástúrli merekesi kezindegi shytyrman oqıǵa týraly baıandalady.
Jyl: 2017
El: AQSh
Rejısser: Lı Ankrıch, Edrıan Molına
Basty rólderde: Entonı Gonsales, Gael Garsıa Bernal, Bendjamın Brett, Alanna Iýbak, Rene Vıktor, Haıme Kamıl, Alfonso Araý, Herbert Sıgensa, Gabrıel Iglesıas, Lombardo Boııar
Ssenarıı: Lı Ankrıch, Edrıan Molına, Mettıý Oldrıch
Kompozıtor: Maıkl Djakkıno
Prodıýser: Djon Lasseter, Darla K. Anderson
Janr: Komedııa, Fentezı, Detektıv, Otbasylyq, Qyzyq oqıǵaly, Mýltfılm, Mıýzıkl
Álemdik premera: 30 qazan 2017
Qazaqstandaǵy premera: 23 qarasha 2017
Jas shekteýi: PG - Ata-analardyń qadaǵalaýy usynylady
Uzaqtyǵy: 109 mınýt
Fılm sıýjeti jan-tánimen mýzykant bolǵysy keletin 12 jasar Mıgel esimdi balanyń armanyna qurylǵan. Mıgeldiń armany Meksıkada aty ańyzǵa aınalǵan ánshi Ernesto de la Krýstyń izin jalǵastyrý. Al onyń otbasynda mýzykaǵa tyıym salynǵany sondaı, úıdiń ishinde bir de bir notanyń dybystalmaýy qatań baqylanady. Otbasy etikshilikti ata kásip sanaıdy, osy sebepti de bala Mıgel asqaq armanynan bas tartyp, otbasylyq kásipke moıynsunýdyń az-aq aldynda. Bul qalada «ólgender kúni» meıramynda qaıtys bolǵandardyń arýaqtary ózderin árdaıym eske tutyp júretin týystarynyń úıine keledi degen senim turaqtaǵan. Sondaı kúnderdiń birinde Mıgel áldeqashan o dúnıelik bolyp ketken ata-babalaryn kezdestirip qalady. Osylaısha áıgili ánshini izdestirip tabýǵa jolǵa shyǵady. Mýltfılm sıýjeti ár árekettiń armanǵa jasalǵan mańyzdy qadam ekenin uqtyryp, kórermendi syrttaı tilekshi etip qoıady.
Pixar stýdııasynyń sýretshileri bul joly óliler mekenin taqyr dalaǵa aınaldyrypty. Tek ár buryshtan qyltıǵan qyrmyzy gúlderin tegin ósip tur dep oılap qalmańyz. Meksıkada bul gúldiń jupar ıisi arýaqtarǵa jaqyndarynyń úıin adaspaı tabýǵa kómektesedi degen senim qalyptasqan. Al fılmdegi bas keıipkerdiń biri Dante atty ıttiń beınesi úshin de sýretshiler az eńbektenbegen. Máselen, janýardyń minezi men anatomııasyn ıgerý úshin stýdııaǵa ksoloıtskýıntlı porodasyna jatatyn ıtti arnaıy aldyrtypty. Mundaı ıtterdiń denesi júnsiz keledi ári tisteri sanaýly bolǵandyqtan únemi derlik tilderi salaqtap júredi. Sonymen birge fılmde maııa, astek mıfologııasynda ıttiń ot pen naızaǵaı qudaıy Ksolotl retinde atalatyndyǵy esepke alynǵan.
Mýltfılmdegi Santa-Sesılıa turǵyndarynan bastap o dúnıedegi Ernesto de la Krýstiń keshine jınalǵan qonaq-qańqalardyń kıimi meksıkalyq bıshilerdiń úlgisinen naqpa-naq kóshirilgen. Kartınadaǵy jan-jaqty zerttelip baryp jazylǵan áńgimeler men tolymdy keıipkerler beınesi synshylar tarapynan oń baǵaǵa ıe boldy.
Sıýjettiń ón boıynda Meksıka halyqtarynyń salt-dástúri jatqany týraly fılm rejısseriniń myna sózi ańǵartady.
«Kartınany túsiremiz dep sheshken kúni alǵashqy ekspedısııa jasaǵyn qurdyq. Úsh jyl boıy mýzeılerdi, shirkeýlerdi, sheberhanalardy, bazalardy, Mehıko, Oahakedegi molalardy túgel araladyq. Tlakolýla, El-Týle, San-Markos, Abasolo turǵyndarymen tildesip, ómir súrý salty, súıikti asy týraly surap bildik. Eń bastysy olardyń otbasyna degen sheksiz súıispenshilikterine kýá boldyq», deıdi Lı Ankrıch óziniń suhbatynda.
«Bolashaq» korporatıvtik qorynyń bastamasymen qazaq tiline dýblıajdalǵan fılm búginnen bastap el kınoteatrlarynda kórsetilip jatyr. Anımasııalyq fılmniń dýblıaj rejısseri Shah-Murat Ordabaevtyń aıtýynsha, dýblıaj jumystaryna 70-ke jýyq maman jumyldyrylǵan.
Aıa О́mirtaı,
«Egemen Qazaqstan»