«Nur Otan» partııasy Tóraǵasynyń birinshi orynbasary Muhtar Qul-Muhammed jumys saparymen Atyraý oblysyna bardy. Sapar barysynda ol memlekettik baǵdarlamalardyń júzege asyrylý barysymen tanysty.
M.Qul-Muhammed Atyraý oblysynyń ákimi Nurlan Noǵaevpen birge «Bıznestiń jol kartasy-2020» baǵdarlamasy arqyly qarjylaı qoldaý kórsetilgen jáne ındýstrııalyq-ınnovasııalyq damý memlekettik baǵdarlamasy aıasynda salynǵan óndiris oryndaryn aralady. Sondaı-aq «Nurly jer» baǵdarlamasy boıynsha salynyp jatqan kóp páterli turǵyn úılerdiń qurylys jumysymen tanysty.
Atyraý oblysy elimizdegi eń iri munaı óndiretin óńirlerdiń biri ekeni belgili. Qazirgi tańda oblysta shıkizatqa táýeldilikten arylyp, ekonomıkanyń ózge sektorlaryn damytýǵa erekshe mán berilip keledi. Sonyń nátıjesinde bıylǵy jyldyń toǵyz aıynda ónerkásiptik óndiristiń kólemi 4 trln teńgeni quraǵan. Bul – ótken jylǵy merzimnen 25 paıyzǵa kóp.
Indýstrııalandyrýdyń 2010-2014 jyldarǵa arnalǵan birinshi bes jyldyǵynda oblysta 28 jańa joba iske qosylyp, nátıjesinde 2,1 myń jumys orny ashyldy. Al 2015-2019 jyldarǵa arnalǵan ekinshi besjyldyqta 3,5 myń adamdy jumyspen qamtýǵa múmkindik beretin taǵy 26 joba júzege asyrylmaq. Al «Bıznestiń jol kartasy-2020» bıznesti qoldaý men damytýdyń biryńǵaı baǵdarlamasy boıynsha Atyraý oblysynda 514 jobaǵa memlekettik qoldaý kórsetilip, sońǵy úsh jylda nesıe portfeliniń kólemi 33 mlrd teńgeden asqan.
«Nur Otan» partııasy Tóraǵasynyń birinshi orynbasary polıetılendi jáne metall plastıkalyq qubyrlar men qubyr jelisine arnalǵan armatýra shyǵaratyn «Shevron MunaıGaz Ink» kompanııasynda da boldy. Kásiporyn ındýstrııalyq-ınnovasııalyq damý memlekettik baǵdarlamasy aıasynda iske qosylǵan-dy. Onda tehnologııalyq úderisterdi baqylap jáne basqaryp otyrýǵa múmkindik beretin arnaıy mıkroprosessorlyq tehnıkalarmen jabdyqtalǵan eýropalyq jetekshi óndirýshilerdiń qazirgi zamanǵy qondyrǵylary ornatylǵan. Osyndaı ereksheliktiń arqasynda Atyraýda sapaly ónim shyǵarýǵa múmkindik týdy. Kásiporynda jasalǵan polıetılendi qubyr sapasy jaǵynan Batys Eýropa men AQSh-ta óndiriletin ónimderden kem emes dep kesip aıtsaq qatelespeımiz.
Zaýyttyń óndiristik qýaty joǵary. Kásiporynda jylyna 450 tonna polıetılendi qubyr men 30 myń synaly ysyrma daıyndaýǵa tolyq múmkindigi bar. Osy rette Atyraýda shyǵarylatyn qubyr jelisine arnalǵan armatýralar jarty ǵasyrǵa deıin qaltqysyz qyzmet etetinin atap ótken jón. О́ıtkeni ony tot baspaıdy, sýdyń dámdik qasıetterin ózgertpeı, sol kúıinde saqtaıdy jáne olar qudyqsyz tásilmen ornatylady. Mundaı tásil sý bólýdi baqylap, resýrstardy únemdeýge múmkindik beredi.
Zaýyt jumysynyń tehnologııalyq múmkindigimen tanysqan M.Qul-Muhammed kásiporynnyń ashylýy Elbasynyń Qazaqstandy úshinshi jańǵyrtý bastamasy ekenin atap ótti. «Atyraýdyń elimizdegi eń iri munaıly óńir ekenin bári biledi. Elbasymyz tek munaımen shektelip qalmaı, oblys ekonomıkasyn ártaraptandyrý kerek ekenin únemi aıtyp júr. Osy zaýytta TMD elderinde ǵana emes, Batys Eýropada naryqqa shyǵarýǵa bolatyn básekege qabiletti, joǵary sapaly ónim óndiriledi. Mine, bizge keregi de dál osy», – dedi M. Qul-Muhammed.
Partııa Tóraǵasynyń birinshi orynbasary optıkalyq kabel shyǵaratyn «PKF Kontınet Ko LTD» zaýytynda da boldy. Kásiporyn memlekettiń qoldaýymen 483 mln teńge kóleminde sýbsıdııa alyp, qyzý jumysqa kirisip ketken. Zaýyttyń óndiristik qýaty bir aýysymmen jumys istegenniń ózinde jylyna 5 myń shaqyrym kabel daıyndaýǵa múmkindik beredi. Al úsh aýysymda bul kórsetkish 12 myń shaqyrymǵa deıin artady. Soǵan sáıkes kásiporyn atalǵan ónimge degen el ishindegi suranystyń 40 paıyzyn qamtamasyz etip otyr. Zaýytta dýaldy oqytý júıesi engizilgen. Nátıjesinde jyl saıyn jergilikti polıtehnıkalyq kolledjdiń ondaǵan stýdenti osy jerde tájirıbeden ótip, biliktiligin arttyrady.
Elbasy N.Nazarbaev memlekettik baǵdarlamalardy júzege asyrý úshin bólingen qarajattyń maqsatty ári tıimdi jumsalýyna únemi baqylaý júrgizýdi barsha nurotandyqtarǵa tapsyrǵany belgili. Soǵan oraı Muhtar Qul-Muhammed óńirdegi eń iri qurylys alańynda bolyp, Memleket basshysy tapsyrmasynyń oryndalýyna nazar aýdardy.
Atyraý qalasynda turǵyn úı qurylysy qarqyndy júrgizilip keledi. Keler jyly «Bereke» shaǵyn aýdanynda «Nurly jer» baǵdarlamasy boıynsha kóp páterli 44 jańa úı paıdalanýǵa berilmek. Ǵımarattardyń 15-i qazirdiń ózinde qoldanysqa ázir. Qurylys jumystary aıaqtalǵan soń 4 myń atyraýlyqqa baspana kilti tabystalady. Sondaı-aq bolashaqta osy aýdanda 1200 oryndy mektep pen eki balabaqsha salý máselesi talqylanyp jatyr.
Baqytgúl BABASh,
«Egemen Qazaqstan»
Atyraý oblysy