Shyǵys Qazaqstanda uzaq ýaqyt boıy jeke quramdy jaýyngerlik daıyndyqqa oqytý jáne daǵdylaryn jetildirýge arnalǵan arnaıy baza bolǵan joq. О́ńir basshysy Danıal Ahmetovtyń qoldaýymen bıyl oblystyq IID qaramaǵyna mańaıynyń aýmaǵy 1 gektardan asatyn eki ǵımarat berildi.
Budan bólek, jóndeý jumystaryna jergilikti bıýdjetten 357 mıllıon teńgeden astam qarjy bólindi. Bul týraly oblys ákiminiń baspasóz qyzmeti habarlady.
«Qazaqstannyń úshinshi jańǵyrýy: jahandyq básekege qabilettilik» atty Elbasy Joldaýynda besinshi basymdyq qaýipsizdik pen sybaılas jemqorlyqqa qarsy kúreske baǵyttalǵan. Búginde atqarýshy bılik pen polısııanyń ózara árekettesýi arqasynda qurylǵan jańa júıe qoǵamdyq qaýipsizdikti qamtyp, quqyq qorǵaýshylar jumysynyń tıimdiligin arttyra túspek. Dese de, oblys ákimi atap ótkendeı, qyzmet sapasyn jaqsartý úshin jeke quramdy oqytýdyń mańyzy joǵary. Osy rette atalǵan baǵyttaǵy jumysty júıeleý úshin departamentte arnaıy daıyndyq basqarmasy quryldy.
– Bir jarym jyl buryn bul ǵımarat bos turǵan edi. Qajetti qarajatty bóldik. Endi oblystyq IID jeke qurammen teorııalyq jáne tájirıbelik turǵyda oqytý ótkizý úshin jaqsy baza bar. Munda daıyndyqtyń barlyq túrinen ótý arqyly qıyn da qaýipti qyzmetterińizde kezdesetin kez-kelgen jaǵdaıǵa daıyn bolǵandaryńyzdy qalaımyz. Taǵy atap óterim, kelesi jyly ishki ister qyzmetkerlerine arnalǵan úıdiń qurylysyn bastaımyz, – dedi ShQO ákimi Danıal Ahmetov.
Jańa ortalyq sońǵy úlgidegi beınebaqylaý, tekserý-ruqsat etý jáne arnaıy baılanys júıelerimen, kabınetter zamanaýı qurylǵylarmen jabdyqtalǵan. Sappen júrý, taktıkalyq-arnaıy sabaqtar ótkizý úshin arnaıy alań da qarastyrylǵan. Ortalyq negizinde alty kúnge shaqtalǵan oqytý-jattyǵý jıyndary ótkiziletin bolady.
Aıta ketý kerek, bıyl oblystyq bıýdjetten IID materıaldy-tehnıkalyq qoryn jaqsartý maqsatynda 3,5 mlrd. teńge bólindi. 276 avtokólik pen 10 avtobýs satyp alyndy. Jalpy ShQO ishki ister qurylymyn avtokólikpen qamtamasyz etý jáne tehnıkalyq qarýlandyrý boıynsha respýblıka boıynsha alǵashqy orynda tur.
Azamat QASYM, «Egemen Qazaqstan»