Atyraýda birneshe aımaqtyq basylymdy biriktirip otyrǵan «Atyraý-Aqparat» seriktestiginde jýrnalısterdi daıarlaý men biliktiligin arttyrý maqsatynda medıa-mektep ashyldy. Joba atalǵan medıa-holdıng pen H.Dosmuhamedov atyndaǵy Atyraý memlekettik ýnıversıtetiniń ózara ýaǵdalastyǵy nátıjesinde iske asyp otyr.
Medıa-mektep keleshekte stýdentterdiń teorııa men praktıkany ushtastyra otyryp, ýnıversıtet qabyrǵasynda júrip-aq redaksııalar men baspahananyń qaınaǵan tirshiligimen emin-erkin aralasýyn, kásibı jýrnalısterden tálim alyp, tájirıbe jınaqtaýyn maqsat tutady. Onda Atyraý memlekettik ýnıversıtetiniń professorlyq-oqytýshylyq quramynan bólek, elimizge jáne óńirimizge tanymal jýrnalıster, medıa mamandary men kásibı trenerler óz tájirıbelerimen bólisip, dáris oqıdy. Sondaı-aq medıa-mektep qabyrǵasynda tek ýnıversıtet stýdentteri ǵana emes, aqparat salasyndaǵy jas mamandar, oqýshylar, jas tilshiler jáne t.b. ynta bildirgen talapkerler bilim alýǵa múmkindik alady. Medıa-mektep zamanaýı dáris aýdıtorııalaryna laıyqtalyp, mýltımedııalyq qurylǵylarmen jabdyqtalǵanyn aıta ketken jón.
Taǵy bir jaǵymdy jańalyq, «Atyraý-Aqparat» medıa-mektebinde oblystyq ishki saıasat basqarmasynyń qoldaýymen jýrnalısterge arnalǵan aqysyz aǵylshyn tili kýrstary jumys isteı bastady.
«Atyraý-Aqparat» JShS dırektory Baıazı Ábdeshev mundaı jobanyń óńirdegi aqparat salasy úshin mańyzy zor ekenin aıtady. «H.Dosmuhamedov atyndaǵy Atyraý memlekettik ýnıversıteti ózindik orny bar, talaı mamandardy daıarlaǵan irgeli bilim ordasy. Sońǵy 20 jylda fılologııa fakýltetiniń janynan jýrnalıstıka kafedrasy ashylǵan bolatyn. Ýnıversıtet pen «Atyraý-Aqparat» seriktestiginiń birlesken jobasy osynaý medıa-mektep arqyly bolashaq jýrnalısterdiń teorııalyq bilimin tájirıbelik biliktilikpen ushtastyrýdy kózdeıdi. Jýrnalıstıka salasyndaǵy bilikti mamandardy daıarlaýda bul bir mańyzdy qadam deýge bolady», – deıdi seriktestik dırektory.
Al H.Dosmuhamedov atyndaǵy Atyraý memlekettik ýnıversıtetiniń rektory Abzal Taltenov, birlesken jobanyń máni men ereksheligine toqtaldy. «Búginde ýnıversıtette jýrnalıstıka mamandyǵynda 150 stýdent oqyp jatyr. Aldaǵy ýaqytta medıa-mektepke tájirıbeli jýrnalıster kelip, dáris oqysa, stýdentter óz bilimin jetildire túseri sózsiz», – dep túıindedi Abzal Taltenov.
Baqytgúl BABASh, «Egemen Qazaqstan»