Búgin Astanada taý-ken metallýrgııalyq saladaǵy 70-ten asa otandyq jetkizýshi kompanııanyń basyn qosqan «Qazaqstandyq ónim jasaımyz» jyl saıynǵy forýmy aıaqtaldy. Is-shara QR Investısııalar jáne damý mınıstrligi, «Kazakhmys Holding» JShS, «Eýrazııalyq Top» JShS, «KazZinc» JShS, KAZ Minerals Toby jáne «Qazaqaltyn» TKMK» AQ-nyń qoldaýymen ótkizildi.
Bıylǵy Forýmǵa 600-den asa delegat qatysty, olardyń qatarynda qazaqstandyq taýar óndirýshiler, taý-ken metallýrgııalyq keshen (ary qaraı - TKMK) kompanııalary, shaǵyn jáne orta bıznes sýbektileri, sondaı-aq, ortalyq jáne jergilikti atqarýshy memlekettik organdardyń ókilderi bar.
Is-shara uıymdastyrýshylary atap ótkendeı, Forýmdy TKMK kompanııalarynyń qatysýymen ótkizý otandyq taýar óndirýshilerimen yntymaqtasýdyń mańyzdy máselelerin talqylaý úshin jańa formatty usyndy. Sondaı-aq, Forým energııa tıimdiligin ulǵaıtý jáne jetkiziletin ónimniń ózindik qunyn tómendetýge arnalǵan jańa sheshimdermen, jobalarmen tanystyrýǵa múmkindik jasady.
Forýmnyń ashylýyna qurmetti qonaqtar, atap aıtqanda, QR ınvestısııalar jáne damý jónindegi birinshi vıse-mınıstri Alık Aıdarbaev, QR ınvestısııalar jáne damý vıse-mınıstri Tımýr Toqtabaev qatysty.
Is-shara kezinde taý-ken metallýrgııalyq saladaǵy jergilikti mazmun kórsetkishterin sapaly deńgeıde ulǵaıtý máselesi kóterildi, atap aıtqanda, TKMK-degi qazaqstandyq mazmunǵa sholý jasalyp, oń tájirıbelerdi jáne jetkizýshilerdiń aldynda turǵan qıyndyqtar, sondaı-aq, qatysýshylardyń ımport almastyrý máselelerine qatysty kózqarasy ashyq talqyǵa salyndy.
Osyǵan oraı QR ınvestısııalar jáne damý jónindegi birinshi vıse-mınıstri Alık Aıdarbaev bylaı dep atap ótti: «Taý-ken metallýrgııalyq keshen Qazaqstan ekonomıkasynyń básekege qabiletti jáne qarqyndy damyp kele jatqan sektorlarynyń biri bolyp tabylady. Osy ónerkásip salasynda 100-ge tarta iri jáne orta kásiporyn qyzmetin júrgizýde. Atalǵan kásiporyndar mashına jasaý, hımııalyq jáne jeńil ónerkásip, qurylys materıaldaryn óndirý syndy basqa salalardaǵy áleýetti jetkizýshilerdi edáýir tapsyrys kólemimen qamtamasyz etedi. Máselen, taý-ken keshenindegi jer qoınaýyn paıdalanýshylar jáne júıe túzýshi kásiporyndar otandyq óndirýshilerden 995,7 mlrd. teńgege teń jalpy somaǵa taýarlar, jumystar men qyzmetterdi satyp alǵan, bul jalpy satyp alýdyń 43,5%-yn quraıdy. Basqasha aıtqanda, otandyq óndirýshiler úshin ishki naryqta úlken áleýet jáne óndiris kólemin ulǵaıý úshin keń múmkindikter bar».
Plenarlyq sessııanyń sońynda forým uıymdastyrýshylary - «Kazakhmys Holding» JShS, «Eýrazııalyq Top» JShS, «KazZinc» JShS, KAZ Minerals Toby jáne «Qazaqaltyn» TKMK» AQ top-menedjmenti Jergilikti mazmundy damytý aıasynda ózara yntymaqtasý jóninde memorandýmǵa qol qoıdy. Memorandým taraptardyń taýarlar, jumystar men qyzmetterdi satyp alý kezindegi jergilikti mazmundy damytý aıasyndaǵy yntymaqtastyǵyn keńeıtip, qatynasyn nyǵaıtýdy kózdeıdi.
«Import almastyrý strategııalary» atty paneldik sessııada eńbek ónimdiligin arttyrýǵa jáne aýmaqtyq klasterlerdi damytýǵa baǵyttalǵan memlekettik qoldaý sharalary jóninde pikirtalas uıymdastyryldy. Osy taqyryp jóninde «Qazaqstan ındýstrııasyn damytý ınstıtýty» AQ basqarma tóraıymy Álııa Arystanbaeva sóz sóıledi. Sessııa kezinde otandyq ónerkásiptik kásiporyndardyń básekege qabilettiligin damytý jáne jergilikti mazmundy damytý sharalaryn daıyndaý maqsatynda memleket pen jeke bıznestiń birlese jumys júrgizý máselesi ortaǵa salyndy.
Qalyptasqan dástúrge saı Forým aıasynda otandyq ónimdi shyǵaratyn kásiporyndar men jetkizýshilerdiń kórmesi ótkizildi. Jergilikti jetkizýshiler seriktestermen tikeleı kezdesýge, kelissózder ótkizýge, óz ónimderin tanystyryp, aqysyz negizde klıentterdi tabýǵa múmkindik aldy. Uıymdastyrylǵan kórme otandyq taýar óndirýshilerdiń áleýetimen, jańa óndiristermen jáne shyǵarylatyn taýarlar tizimdesimen tanystyrdy.
Forým sońynda eń úzdik jetkizýshilerdi marapattaý saltanaty ótti. Árbir uıymdastyrýshy kompanııa óziniń seriktesterin marapattady.