Almatynyń ásem tabıǵaty men kórikti jerleri kez kelgen elden kelgen týrısterdi ózine baýrap alýǵa qaýqarly. Ol úshin Almaty týrızminiń tynysyn ashyp, arnasyn keńeıtý qajet.
Osy maqsatty negizge ala otyryp, Almatyda Dúnıejúzilik týrıstik uıym men «Visit Almaty» týrıstik aqparattyq ortalyǵy arasyndaǵy jartyjyldyq kelisimshart aıasynda Almaty klasterlerindegi Uly Jibek joly týrısiniń beınesin zertteý baǵdarlamasynyń bastalýyna qatysty baspasóz máslıhaty ótti. Is-shara barysynda Almaty qalasy týrızm jáne syrtqy baılanystar basqarmasynyń basshysy Erlan Jaılaýbaı men Dúnıejúzilik týrıstik uıymnyń Jibek joly baǵdarlamasynyń sarapshysy Nıkolaýs Golfınopýlos jýrnalısterge jobanyń maqsaty men mindetteri jaıly keń kólemde baıandap berdi.
– Atalǵan zertteý Almaty qalasy ákimdiginiń tapsyrysy boıynsha DTU-men birge júrgizilýde jáne aımaqtaǵy týrızmniń damýynda, Qazaqstandaǵy týrızm ındýstrııasynyń úlken múmkindikterin ashýda óte zor mańyzy bar. Zertteý nátıjelerinde Almaty qalasyna kelgen týrıstiń qalypty beınesin, qalamyzdyń týrıstik erekshelikterin, úlken týrıstik aǵymdy qabyldaı alatyn múmkindigin, sheteldik qonaqtar tarapynan qanaǵattaný deńgeıin, sonymen qatar Almaty qalasyn Uly Jibek jolynyń tanymal brendi retinde qalaı paıdalanatynyn biletin bolamyz. Atalǵan joba Qazaqstanda alǵash ret júrgizilip otyr, sondyqtan biz Dúnıejúzilik týrıstik uıymǵa alǵys bildiremiz. Joba oıdaǵydaı iske assa Almaty týrısterdiń qalasyna aınalmaq, – deıdi Visit Almaty týrıstik aqparattyq ortalyǵynyń basshysy Ásel Nurkebaeva.
Jobanyń negizgi maqsaty – megapolıstiń týrıstik áleýetin arttyryp, týrızmniń keńge qanat jaıýyna jaǵdaı jasaý. Ol úshin shet memleketten kelgen saıahatshylarǵa týrızmniń barlyq talaptaryna saı sapaly qyzmet kórsetý qajet. Seriktestik aıasynda Dúnıejúzilik týrıstik uıym Almatyǵa keletin týrıstiń beınesin tolyqtaı zerttep, qaladaǵy týrızmniń damýyna jáne saraptama júıesine negiz qalap beredi. Sonymen birge atalǵan uıym jańa jumys oryndarynyń paıda bolý múmkindikterin, Almaty qalasynyń týrızm salasyndaǵy tabysynyń ósýin baǵalaıtyn bolady.
Almaty qalasy týrızm jáne syrtqy baılanystar basqarmasynyń basshysy Erlan Jaılaýbaıdyń aıtýynsha, Visit Almaty jáne Dúnıejúzilik týrıstik uıymnyń birikken zertteý jumystary qala ákimdigine Almaty qalasy jáne oblysynyń týrızmin damytý jáne qazaqstandyq týrıstik naryqtyń halyqaralyq naryqta básekege qabilettiligin alǵa jyljytyp, Almaty qalasynyń demalys pen týrızmge qolaıly qala retindegi jaqsy ımıdjin qalyptastyrýǵa, marketıngtik strategııalardy josparlap, iske asyrýǵa múmkindik beredi.
Basqosý barysynda túıgenimiz, Almatynyń ásem kórkin tamashalaýǵa kelgisi keletin týrıster sany óte kóp. Tek olarǵa qyzmet kórsetý sapasyn zamanaýı standarttar deńgeıine kóterip, aqparattyq nasıhat jumystaryn bir júıege keltirý qajet. Mamandar Almatynyń kópke tanymal Medeý, Shymbulaq sııaqty kórikti jerlerimen shektelip qalmaı, aldaǵy ýaqytta elimizdiń baı dástúri men taǵylymdy tarıhynan syr shertetin týrısterge arnalǵan jańa demalys nysandarynyń boı kóteretinin aıtty.
Arman OKTIаBR,
«Egemen Qazaqstan»
ALMATY