О́skemende «Nurly jer» memlekettik baǵdarlamasynyń «Jeke qurylys salýshylardy turǵyn úı salýǵa yntalandyrý» baǵyty boıynsha salynǵan eń alǵashqy kóppáterli turǵyn úıdi satý kelisimsharty jasaldy. Mańyzdy qujatqa «Qazaqstannyń turǵyn úı qurylys jınaq banki» aksıonerlik qoǵamy oblystyq fılıalynyń basshysy Nurlan Kúzembaev pen «Vostok-Klıo» jaýapkershiligi shekteýli seriktestiginiń dırektory Vıacheslav Tarnaıkın qol qoıdy.
Toqsan bes páterli, bes qabatty jańa úı Kúlenov yqshamaýdanynda boı kótergen «Rıvera Rezıdens» turǵyn úı kesheninde ornalasqan. Erekshe sáýletimen kóz tartatyn záýlim ǵımarat alańynda birneshe sport jáne oıyn alańdary, avtoturaq, senimdi qaýipsizdik júıesi, dárihanalar men naýbaıhana, sýpermarket, bank bólimsheleri ashylyp, keshen turǵyndary úshin barynsha qolaıly jaǵdaı jasalǵan. Búginde aýmaǵy 46 sharshy metrden 242 sharshy metrge deıin bolatyn bir, eki, úsh, tórt bólmeli páterler satyla bastapty.
«Jeke qurylys salýshylardy turǵyn úı salýǵa yntalandyrý» baǵytyn júzege asyrýǵa úsh tarap qatysyp otyr. Ekinshi deńgeıdegi «Sentrkredıt Bank» jeke qurylys salýshy «Vostok-Klıo» jaýapkershiligi shekteýli seriktestigine jeńildikpen nesıe beredi. О́ıtkeni, halyqtyń ár sanatynyń turǵyn úı máselesin keshendi sheshý maqsatynda Elbasynyń tapsyrmasymen qolǵa alynǵan osy baǵdarlamanyń aıasynda memleket «Damý» AQ arqyly jeke qurylys salýshylardyń nesıeleri boıynsha syıaqy mólsherlemesiniń 7 paıyzyn sýbsıdııalap otyr. Munyń ózi salynǵan turǵyn úıdiń sharshy metriniń qunyn tómendetýge múmkindik beripti. Máselen, atalǵan úıdiń naryqtaǵy baǵasy sharshy metrine 200 myń teńge bolsa, usynylyp otyrǵan baspananyń sharshy metri - 175 myń teńge. «Qazaqstannyń turǵyn úı-qurylys jınaq banki» aksıonerlik qoǵamynyń oblystyq fılıaly bul páterlerdiń 50 paıyzyn óz salymshylaryna usynady. Turǵyn úı rásimdeýde azamattardyń jasyna qaramaıdy. Úı qunynyń 30 paıyzyn tólep, ári qaraı nesıe tóleýge jalaqysy jetetin bolsa, kez kelgen azamat baspana ala alady. О́ńirimizde turǵyn úı qurylysy qarqyndy damyp keledi. «Qazaqstannyń turǵyn úı-qurylys jınaq banki» salymshylarynyń sany 78 myńnan asty. Búgingi tańda bankten shot ashýǵa jeńildik jasalyp, tegin júrgizilip jatyr. Shotqa belgili merzimge deıin qarjy jınaǵan soń salymshylarymyz ıpoteka ǵana emes, sonymen qatar jeke úı salýyna, baspanasyn jóndeý jumystaryna qajetti nesıeni bankten arzan paıyzben ala alady. Bıyl jyl sońyna deıin 1142 salymshy óz baspanalarynyń kiltine ıe bolady. Al aldaǵy 2018 jyly taǵy da bir myńnan astam páter salymshylarǵa usynylady»,-deıdi «Qazaqstannyń turǵyn úı-qurylys jınaq banki» aksıonerlik qoǵamy oblystyq fılıalynyń dırektory N.Kúzembaev.
Azamat QASYM,
«Egemen Qazaqstan»
О́SKEMEN