Bosnııalyq horvat áskerleriniń burynǵy komandıri 72 jastaǵy general Slobodan Pralıak 20 jylǵa sottalǵany týraly sot sheshimin estigen bette ý ishti. Sýdıanyń aıtýynsha, ol qaıtys boldy. Bul týraly BBC habarlady.
Gaagalyq sot Pralıaktan ózge bes bosnııalyq horvattyń appelıasııasyn qaraǵan. 2013 jyly Pralıakqa bosnııalyq musylmandarǵa qarsy áskerı qylmys jasady degen aıyp taǵylyp, 20 jylǵa bas bostandyǵynan aıyrǵan.
Úkim ózgerissiz qalatyny belgili bolǵannan keıin Pralıak basyn shalqaıtyp, qutydaǵy suıyqtyqty jutyp jiberedi. Osydan keıin ol sýdıaǵa qarap: «Qazir ǵana ý ishtim. Men bul sheshimge narazymyn», deıdi. Onyń áreketin advokaty da rastaıdy. О́z kezeginde sýdıa birden sot otyrysyn toqtatyp, dáriger shaqyrady. Arada úsh saǵat ótkennen keıin jergilikti telearnalardyń biri onyń qaıtys bolǵanyn habarlady.
Tórt jyl buryn trıbýnal bosnııalyq horvattardyń kóshbasshysy Iаdranko Prlıchýdy 25 jylǵa bostandyǵynan aıyrǵan bolatyn.
Prlıch pen Pralıak 1991 jyly Iýgoslavııa men Bosnııa soǵystarynyń ydyraýy nátıjesinde qalyptasqan, ıaǵnı moıyndalmaǵan Gerseg-Bosna respýblıkasy basshylyǵynyń quramyna engen. 2004 jyly Pralıak pen ózge bes generalǵa 1993 jyly Bosnııada musylmandardy aıaýsyz qyrdy degen aıyp taǵyldy. Mundaı habardy estigennen keıin olar Gaagadaǵy halyqaralyq qylmystyq trıbýnalǵa esh qarsylyqsyz berilgen.
О́tken aptada Gaagalyq trıbýnal bosnııalyq serb áskeriniń burynǵy generaly Ratko Mladıchti ómir boıyna bas bostandyǵynan aıyrǵan bolatyn. Trıbýnaldyń pikiri boıynsha Mladıch bosnııalyq soǵys kezinde myńdaǵan beıbit turǵyndy aıaýsyz óltirgen. Al eń basty taǵylǵan aıyp – 1995 jyly onyń buıryǵy boıynsha jeti myń musylman ólim jazasyna kesilgen. Onyń aıaýsyz áreketi úsh jylǵa jalǵasqan. Osy ýaqyt aralyǵynda 10 myńnan astam adam mert boldy. Mladıch bul aıyptardyń eshqaısysymen kelispeıtinin, tek azamattyq soǵys kezinde óz halqyn qorǵaǵanyn aıtyp aqtaldy.
Daıyndaǵan Aıan ÁBDÝÁLI, «Egemen Qazaqstan»