«100 naqty qadam» Ult josparynyń 100-qadamynda «Azamattarǵa arnalǵan úkimet» memlekettik korporasııasy halyqqa qyzmet kórsetetin barlyq ortalyqtardy bir júıege ıntegrasııalap, Qazaqstan azamattary memlekettik qyzmetterdi bir jerden alatyn bolady dep kórsetilgen. Alaıda, biz óńirlerde bolyp, saılaýshylarmen kezdeskende osy korporasııaǵa qaraıtyn halyqqa qyzmet kórsetý ortalyqtarynyń tolyqqandy jumys isteýine kedergi keltirip otyrǵan birqatar túıindi máseleler barlyǵyn anyqtadyq. Atap aıtqanda, halyqty áleýmettik qorǵaý, densaýlyq saqtaý jáne taǵy basqa memlekettik qyzmet kórsetýde qoldanylatyn aqparattyq júıeler áli de jetkilikti ıntegrasııalanbaǵan. Munyń bári elektrondy qyzmet kórsetý kóleminiń ósýin tejep otyr.
Sondaı-aq meken-jaılar anyqtamalyǵynda aýyldyq okrýgter ákimderiniń apparattary kórsetilmegendikten, qyzmet alýshylar negizinen aýdan ákiminiń apparatyna barady. Alaıda, jekelegen qyzmet túrlerin aýyldyq okrýgterdiń ákimderi kórsetýge tıisti. Mysaly, «Eldi meken sheginde obekt salý úshin jer ýchaskesin berý», «Jer ýchaskesiniń nysanaly maqsatyn ózgertýge ruqsat berý» sııaqty qyzmet kórsetýler Jer kodeksiniń baptaryna sáıkes jeke jáne zańdy tulǵalar jer ýchaskesi ornalasqan jerdegi jergilikti atqarýshy organǵa ótinish beredi dep jazylǵan.
Sonymen qatar «Saýda-sattyqty (konkýrstardy, aýksıondardy) ótkizýdi talap etpeıtin memleket menshigindegi jer ýchaskelerine quqyqtar alý» jáne ««Jol boıyndaǵy servıs obektilerin ornalastyrý úshin jer ýchaskelerin tabystaý týraly sheshim qabyldaý» memlekettik kórsetiletin qyzmet standarttarynda jerge ornalastyrý jobasy men komıssııanyń oń qorytyndysyn tapsyrý qarastyrylmaǵan. Alaıda, Jer kodeksiniń 43-babynyń 2-tarmaǵyna sáıkes jer ýchaskesin berý týraly sheshim atalǵan qujattardyń negizinde qabyldanady. Demek, bul standarttar qoldanystaǵy zańnamaǵa qarama-qaıshy keletindikten, Ulttyq ekonomıka mınıstriniń 2016 jylǵy 30 naýryzdaǵy №151 buıryǵyna tıisti túzetý engizý qajet.
Budan bólek, memlekettik kórsetiletin qyzmetter reestrine sáıkes jergilikti atqarýshy organdar avtobýstarmen, mıkroavtobýstarmen qalaaralyq, oblysaralyq, aýdanaralyq jáne halyqaralyq qatynastarda jolaýshylardy tasymaldaý isimen aınalysý quqyǵyna lısenzııa berý qyzmetin kórsetedi. Alaıda, atalǵan qyzmet «E-lısenzııalaý» portalynyń «Kólik» bóliminde» jáne «Qyzmetti lısenzııalaý» bóliminde úshke bólinip kórsetilgen. Sonyń saldarynan kásipkerler úsh túrli qyzmet boıynsha lısenzııa alýǵa májbúr bolyp otyr.
Taǵy bir jaıt, HQO-larda kezekshilik jasaıtyn keıbir tar sheńberli mamandyqqa ıe dárigerlerdiń tapshylyǵy saldarynan kólik júrgizý quqyǵyn alǵysy keletin adamdar keıde ýaqyttaryn tekke joǵaltyp, oryndy renish bildirip jatady. Osyǵan oraı ony turǵylyqty jerlerindegi emhanalardan alatyn medısınalyq anyqtamamen almastyrǵan jón bolar.
Osy máselelerdi qarastyrýdy ótinip, Premer-Mınıstrdiń orynbasary A.Jumaǵalıevke depýtattyq saýal joldandy.
Maıra AISINA, Májilis depýtaty