Bıylǵy jyl elimizdiń Memlekettik kúzet qyzmeti úshin mereıli jyl. Sebebi Qazaqstan Respýblıkasy Prezıdentiniń kúzet qyzmeti men Respýblıkalyq Ulannyń qurylǵanyna 25 jyl tolyp otyr. Shırek ǵasyr boıy óz qyzmetin minsiz atqaryp kele jatqan qurylym qatary bıyl da jas sarbazdarmen tolyqty.
Qazaqstan Respýblıkasynyń Memlekettik kúzet qyzmetine Memleket basshysynyń, kúzetiletin adamdar men obektilerdiń qaýipsizdigin qamtamasyz etý, memlekettik etalondardy kúzetý jáne memlekettik-hattamalyq is-sharalarǵa qatysý jónindegi mańyzdy jáne jaýapty mıssııa júktelgen.
Elimizdiń barlyq óńirlerinen áskerı qyzmet atqarý jáne Otan aldyndaǵy konstıtýsııalyq boryshyn óteý úshin jańadan qabyldanǵan 295 sarbaz Almatydaǵy 0111 áskerı bóliminde saltanatty túrde áskerı ant qabyldady. Bul akt erekshe áskerı joralǵy sanalyp, áskerı qyzmetshilerdiń boıyndaǵy patrıotızm, Otanǵa jáne Prezıdentke adal bolý, sondaı-aq Qazaqstan Respýblıkasy Memlekettik kúzet qyzmetiniń qatarynda adal qyzmet atqarý sııaqty qasıetterge tárbıeleıdi.
– Kúzgi áskerge shaqyrý naýqany kezinde qyzmettiń ofıserleri áskerı qyzmetke 2500-den artyq úmitkerdi zerttep-zerdeledi, bir orynǵa 8-9 adamnan keldi. Áskerge shaqyrý nátıjesi boıynsha qyzmet qataryna shaqyrylǵan jas sarbazdardyń sapalyq sıpattamasy joǵarǵy deńgeıde ekenin kórýge bolady. Kóptegen áskerı qyzmetshilerdiń joǵary jáne orta-arnaıy bilimi, sondaı-aq sporttyq jetistikteri bar. Qyzmet úmitkerlerine qatań talaptar qoıyldy. Eń bastysy myqty densaýlyq, bilimimen qatar bet-álpetiniń symbattylyǵy bolýy shart.
Máselen, boıy 180 santımetrden 190 santımetrge deıin, boıy men salmaǵynyń qalyptylyǵy, orta (tolyq) biliminiń bolýy oqý jáne jumys oryndarynan berilgen jaqsy minezdemeleri eskerildi. Úmitkerdiń moraldyq-iskerlik qasıetterine jáne dene shynyqtyrý daıyndyǵyna erekshe nazar aýdaryldy. Áskerı qyzmet úshin iriktelip alynǵan úmitkerler QR UQK organdarynan arnaıy tekserýden ótedi. Sarbazdar bir aı boıy jas jaýynger kýrsynan ótti jáne búgin óte qysqa merzimde alǵan mashyq-daǵdysyn kórsetti, – deıdi Memlekettik kúzet qyzmeti «Batyr» Prezıdenttik polkiniń maıory Qaırat Tarın.
Sarbazdardyń áskerı ant qabyldaý rásimine Almaty qalasy ákimdiginiń ókilderi, qoǵam qaıratkerleri, Memlekettik kúzet qyzmetiniń ardagerleri, jas sarbazdardyń ata-analary men týystary qatysty. Memlekettik kúzet qyzmetiniń áskerı qyzmetshileri ózderiniń sheberlikterin, kásipqoılyǵy men is-qımyldarynyń úılesimdigin kórsetip, jıylǵandardy tánti etti. Sondaı-aq Prezıdenttik úrmeli aspaptar orkestri men qurmet qaraýyl rotasy plas-konserttiń (defıle) jańa baǵdarlamasyn kórermen nazaryna usyndy.
Otan aldynda ant qabyldaǵan sarbazdar aldaǵy ýaqytta Memlekettik kúzet qyzmetiniń áskerı bólimderi boıynsha taratylyp, áskerı merzim aralyǵynda júktelgen asa jaýapty mindetterdi atqarýǵa kirisetin bolady.
Arman OKTIаBR,
«Egemen Qazaqstan»
ALMATY