2017 jyldyń 6 jeltoqsan kúni saǵat 10.00-de L.N.Gýmılev atyndaǵy Eýrazııa ulttyq ýnıversıtetiniń Tuńǵysh Prezıdent aýdıtorııasynda (Q.Sátbaev kóshesi, 2. Bas ǵımarat, 208 aýd.) asa kórnekti etnograf, fılologııa ǵylymdarynyń doktory, professor Aqseleý Seıdimbektiń 75 jyldyq mereıtoıyna arnalǵan «Aqseleý Seıdimbek jáne tarıh ǵylymyndaǵy shejiretaný máseleleri» atty halyqaralyq ǵylymı-praktıkalyq konferensııa ótedi.
L.N.Gýmılev atyndaǵy Eýrazııa ulttyq ýnıversıteti «Qazaqstan halqy assambleıasy toleranttylyǵy jáne etnosaralyq qatynastar ortalyǵy» uıymdastyryp otyrǵan sharaǵa alys-jaqyn shetelderden ǵalymdar men elimizdiń ár óńirinen tarıhshylar jáne ádebıettanýshylar shaqyrylyp otyr. Sonymen qatar halyqaralyq ǵylymı-tájirıbelik konferensııaǵa QR Parlamenti Senaty men Májilis depýtattary, memleket jáne qoǵam qaıratkerleri, aqyn-jazýshylar men kózi tirisinde qatar júrgen úzeńgiles qalamger dostary qatysady dep kútilýde.
Halyqaralyq konferensııa L.N.Gýmılev atyndaǵy Eýrazııa ulttyq ýnıversıtetiniń rektory, QR UǴA akademıgi Erlan Sydyqovtyń alǵy sózimen ashylyp, jıynǵa EUÝ-diń áleýmettik-mádenı damý jónindegi prorektory, akademık Dıhan Qamzabekuly moderatorlyq jasaıdy.
Plenarlyq májiliste QR Memlekettik syılyǵynyń ıegeri Q. Salǵara «Aqseleý – ulttyq tulǵa»; Qazaqstan halqy assambleıasy toleranttylyǵy jáne etnosaralyq qatynastar ortalyǵynyń dırektory, t.ǵ.d., professor S. Syzdyqov «Ortaǵasyrlyq qarlyq túrkileriniń qazaq shejiresimen baılanysy»; QR UǴA akademıgi H. Ábjanov «Sakraldy geografııa: máni, qurylymy, keleshegi»; fılologııa ǵylymdarynyń doktory, professor Sh. Ybyraev «Qazaqtyń dástúrli mádenıetin zertteýshisi»; QR UǴA korrespondent-múshesi B. Káribaev «Naıman shejiresine qatysty HÚIII-HIH ǵasyrlardaǵy orys tilindegi materıaldar jáne olarǵa sıpattama»; Shoqan Ýálıhanova atyndaǵy Kókshetaý memlekettik ýnıversıtetiniń professory K. Ábýov «Shoqan Ýálıhanov qazaqtardyń aýyzsha tarıhy týraly»; fılologııa ǵylymdarynyń doktory B.Rahymov «Seleýli dala perzenti» taqyrybynda baıandama jasaıdy.
Konferensııa barysynda A.Seıdimbek týraly derekti fılm kórsetilip, ǵalym týraly kitaptardyń tusaýkeser rásimi uıymdastyrylady.
Halyqaralyq shara «Eýrazııanyń aýyzsha tarıh dástúri (shejire)» jáne «Ádebıettaný, tili bilimi jáne jýrnalıstıkany zertteý máseleleri» taqyrybynda eki seksııa boıynsha óz jumysyn jalǵastyratyn bolady.
Kórnekti ádebıettanýshy ǵalym, etnograf, óner zertteýshisi, Qazaqstan Respýblıkasy Memlekettik syılyǵynyń laýreaty, fılologııa ǵylymdarynyń doktory, professor Aqseleý Slanuly Seıdimbek 1942 jyly 12 jeltoqsanda Qaraǵandy oblysynyń Jańaarqa aýdanyndaǵy Baıdaly bı aýylynda dúnıege kelgen. Ál-Farabı atyndaǵy Qazaq ulttyq ýnıversıtetiniń jýrnalıstıka fakýltetin bitirgen soń ómiriniń ár kezeńinde «Jas alash», «Ortalyq Qazaqstan», «Egemen Qazaqstan» gazetteri, «Zerde» jýrnaly, «Álem» almanaǵy redaksııalarynda túrli shyǵarmashylyq basshy qyzmetterde boldy.
Elimiz táýelsizdik alǵannan keıin biryńǵaı ǵylymı jumysqa aýysyp, Y.Altynsarın atyndaǵy Bilim problemalary ınstıtýtynyń dırektory, Qazaq Bilim akademııasynyń prezıdenti, Prezıdenttiń mádenı ortalyǵy dırektorynyń orynbasary qyzmetterin atqardy. 2000 jyldan bastap L.N.Gýmılev atyndaǵy Eýrazııa ulttyq ýnıversıtetiniń kafedra meńgerýshisi, professory bolyp qyzmet istedi.
Aqseleý Seıdimbek oqyrmanǵa aldymen jýrnalıst retinde tanyldy. Onyń pýblısıstıkalyq eńbekteri jýrnalıstıkany jańa deńgeıge kóterdi. Jánibek Kármenov ekeýiniń qazaqtyń án óneri týraly syr-suhbattar serııasy Qazaq televızııasynyń altyn qoryna kirdi.
Ol ádebıettanýshy jáne etnograf ǵalym retinde ulttyq tóltýmalyqty aıǵaqtaýǵa eleýli úles qosty, qazaqtyń qara óleńderi men kúı ańyzdaryn júıelep, ǵylymı aınalymǵa túsirdi. Qazaqstanda etnografııalyq jáne etnologııalyq izdenisterdiń jandanýyna yqpal etti. Aqseleý Seıdimbektiń esimi zerdeli óner zertteýshisi ári óristi óner ıesi retinde halqymyzǵa keńinen tanymal. Qazaqtyń dástúrli ánshilik ónerin tuǵyr ete otyryp, «Saryarqa», «Dáýren-aı», «Tolǵaý» sııaqty ult rýhyn kóteretin tamasha ánder shoǵyryn dúnıege ákelgen Aqseleý Seıdimbek – Qazaqstan Respýblıkasy Ulttyq Keńesiniń, «Mádenı mura» memlekettik baǵdarlamasy qoǵamdyq keńesiniń, Qazaqstan Jazýshylar odaǵy basqarmasynyń, PEN-klýbtyń múshesi. Ol – «Qazaq ádebıetiniń tarıhy» atty on tomdyq tolymdy eńbek avtorlarynyń biri. Onyń «Kúı-shejire», «Kóshpeliler tarıhy», «Qazaq álemi», «Qazaqtyń aýyzsha tarıhy» sııaqty irgeli eńbekteri ult rýhanııatynyń baǵaly qazynasyna aınaldy. Marqumnyń el birligin saqtaý, memleket táýelsizdigin nyǵaıtý, ult rýhanııatyn ulyqtaý taqyrybyna jazǵan taǵylymdy eńbekteri óz aldyna bir tóbe.
Otyzǵa jýyq kórkem, ǵylymı-kópshilik, monografııalyq eńbekter jazyp, sońyna mol mura qaldyrǵan Aqseleý Seıdimbektiń eńbegi laıyqty baǵalanyp, ol Qazaqstan Respýblıkasy Memlekettik syılyǵynyń laýreaty, Qazaqstannyń eńbek sińirgen qaıratkeri atanyp, «Qurmet» ordenimen marapattaldy.