Aqparat jáne kommýnıkasııalar mınıstri Dáýren Abaev «Qazaqstannyń 100 jańa esimi» jobasy boıynsha aldaǵy ýaqytta qandaı jumystar josparlanyp otyrǵanyn atady, dep habarlaıdy «QazAqparat».
«Shynynda da, olar tanymal bola bastady. Zamanaýı tehnologııalar zamanynda jańalyqtar legi tez umytylyp ketýi múmkin. Sondyqtan, «Qazaqstannyń 100 jańa esimi» boıynsha biz arnaıy jol kartasyn ázirledik. Kelesi jyly sátin salsa úzdik júzdikke engen adamdarǵa arnalǵan 100 telenovella jaryqqa shyǵar dep úmittenemin. Biz bul týraly áli de tolyǵyraq aıtamyz. Múmkin bul arnaıy rolıkter retinde shyǵady. Olar baǵdarlamaǵa qatysady», - dedi Dáýren Abaev Aqparat jáne kommýnıkasııalar mınıstrliginiń Qoǵamdyq keńesiniń kezekti otyrysynda.
Mınıstrdiń aıtýynsha, úzdik júzdikpen birge, jalpy jobaǵa qatysqan 2100 adam umyt qalmaıdy.
«Qolymyzdan kelse, bul adamdar jastardyń aldynda sóz sóılep, ashyq sabaq ótkizse degen oıymyz bar. Tolyq joba bar. Biz bul jobany jaıdan-jaı qaldyrmaımyz. Men bir qupııanyń betin ashaıyn. Biz ústel basynda otyrǵanda Prezıdent jalpy tizimge qansha adamnyń tirkelgenin surady. Men 2100 adam ekenin atadym. Ol sol kezde 2100 adamnyń barlyǵyn úlgi etýdi surady», - dedi Dáýren Abaev.
Ol sonymen birge, jumys jańa formatta jalǵasatynyn tilge tıek etti.
Dáýren Abaevtyńaıtýynsha, bul búkil mınıstrlikterdiń, QHA-nyń birlese atqaratyn jumysy. «Eń basty jetistik - búkil azamattyq qoǵamnyń qoldaý bildirýi», dedi.