Aqtóbe oblysynyń ákimi Berdibek Saparbaevtyń Qytaı halyq respýblıkasyndaǵy jumys babyndaǵy sapary barysynda aqtóbelik delegasııa óńirdiń ınvestısııalyq múmkindikterin tanystyrdy.
Sharany Qazaqstan respýblıkasynyń Qytaı halyq respýblıkasyndaǵy elshiligi «NK «Kazakh Invest» AQ-men jáne Aqtóbe oblysynyń ákimdigimen birge uıymdastyrǵan bolatyn. Oǵan Aqtóbe oblysynyń ákimi Berdibek Saparbaev, Qazaqstan respýblıkasynyń Qytaı halyq respýblıkasyndaǵy elshisi Shahrat Nuryshev, óńirdegi iri kásiporyndardyń basshylary, QHR-dyń Halyqaralyq saýda-sattyqqa járdemdesý jónindegi Qytaı komıtetine, Qytaıdyń ónerkásiptik-kommersııalyq federasııasyna, jeńil ónerkásip assosıasııasyna jáne ózge de birlestikterge kiretin iskerlik ortasynyń ókilderi qatysty.
Berdibek Saparbaev oblystyń ınvestısııalyq áleýetimen, negizgi óndiris faktorlarymen, ınvestısııalaýǵa qajet qolaıly jaǵdaılarmen jáne ekonomıkanyń keleshegi bar salalarymen tanystyrdy, sonymen qatar, óńirdiń «Nurly jol» jańa ekonomıkalyq saıasaty men qytaıdyń «Bir beldeý, bir jol» bastamasynyń rólin atap ótti.
Qytaılyq ınvestorlarǵa usynylǵan perspektıvti ınvestısııalyq jobalardyń qatarynda bolat pen shoıyn túrindegi daıyn ónim shyǵaratyn taý-ken metallýrgııalyq kesheniniń, temir rýdalaryn qaıta óńdeıtin taý-ken metallýrgııalyq kesheniniń, qaldyqtardy kádege jaratatyn elektr beketiniń, aýylsharýashylyǵy óniminiń kólik-logıstıkalyq ortalyǵynyń qurylysy, «Ashysaı» tıtan-sırkonıı ken ornyn ıgerý jáne t.b. bar.
Sharanyń qorytyndysy boıynsha qol qoıylǵan tórt memorandým óńirde munaı-gaz salasy úshin («Sıhaı» Shandýn munaı ınjenerlik kompanııasy) hımııalyq ónimderdi óndirý, geofızıkalyq jáne seısmıkalyq-barlaý jumystary úshin elektrondyq qural-jabdyqtardy shyǵarý («Sıan Lýhaı» geofızıkalyq tehnologııalar» kompanııasy), burǵylaý quraldaryn (Dongying Weima Petroleum Drilling Tool) shyǵarý salasyndaǵy ınvestısııalyq jobalardy, sonymen qatar, qýattylyǵy táýligine 2,5 myń tonna bolatyn sement zaýytynyń (Sino-Harbor Construction Group Gonkong kompanııasy) qurylysyn júzege asyrýdy qarastyrady.
«SNPS-Aqtóbemunaıgaz» AQ bas dırektory Van Szıýnjen otandastaryna Aqtóbe oblysy basshylyǵynyń sheteldik ınvestorlarǵa úlken qoldaý kórsetip otyrǵandyǵyn aıtty.
Sondaı-aq, Beıjińde «NK «Kazakh Invest» AQ janynan Aqtóbe oblysynyń ınvestısııalardy tartý jáne eksportty damytý jónindegi ókildigi ashyldy.
«Memleket basshysy Nursultan Nazarbaevtyń «Bir beldeý, bir jol» bastamasyna baılanysty baǵdarlamany Qytaı elimen birge júzege asyrý jónindegi tapsyrmasy bar. Sondyqtan, Qazaqstannyń QHR-daǵy elshiliginiń qoldaýymen biz «Kazakh Invest» UK» AQ-men birge óz ókildigimizdi ashyp otyrmyz. Bizdiń maqsatymyz – qytaılyq kásipkerlerdi Aqtóbe oblysymen jáne onyń ınvestısııalyq múmkindikterimen tolyq ári jaqsyraq tanystyrý, óńirge ınvestısııa tartý aýqymyn keńeıtý, sonymen qatar, bizde óndiriletin ónimderdiń Qytaıǵa eksporttalýyna yntalandyrý. Biz atalmysh ókildiktiń qyzmetiniń júzege asyrylýyn qamtamasyz etemiz», dedi Berdibek Saparbaev.
Temir Qusaıyn
«Egemen Qazaqstan»