Indýstrııalandyrý kúni Oral qalasynda jylyna 7000 tonna qus etin óndiretin jańa qus fabrıkasy ashyldy. Elbasy N.Á.Nazarbaevtyń qatysýymen ótken «Eldi jańa ındýstrıalandyrý: Qazaqstan barysynyń serpini» atty telekópirde óńir basshysy Altaı Kólginov Batys Qazaqstan oblysynda ındýstrıalandyrý kartasy boıynsha jalpy quny 8 mlrd teńgege baǵalanǵan 10 joba iske qosylǵanyn aıtty.
Batys Qazaqstan oblysy jylyna 10 myń tonna qus etin tutynsa, osy kezge deıin ony túgel derlik syrttan tasıtyn. «Jaıyq Agro LTD» JShS ashyp otyrǵan jańa kásiporyn endi bul qajettilikti ótemek.
Broıler qus fabrıkasy Zelenov aýdanynyń Shapov aýylynda ornalasqan. Inkýbator, jem sehy, qus bordaqylaıtyn 24 korpýs, soıý sehy, taǵy basqa tolyp jatqan qosymsha qurylystardan turatyn alyp keshenniń quny 4200 mln teńge eken. Kásiporynda óndirilgen ónimniń 90 paıyzy jergilikti naryqqa shyǵarylsa, 10%-y eksportqa jóneltilmek. Jumyrtqadan – balapan, balapannan – taýyq ósiretin, tolyq tehnologııalyq tizbekke qurylǵan kásiporyn syrtqy maýsymdyq faktorlarǵa táýelsiz, júıeli jumys isteıdi. 150 adam turaqty jumys isteıtin fabrıkada qus eti tutynýshyǵa tutastaı da, bólshektelip te usynylady eken. Sondaı-aq «Jaıyq Agro LTD» ujymy aldaǵy ýaqytta qus azyǵyn daıyndaıtyn arnaıy zaýyt ashýdy da josparlap otyr.
- Qazaqstan Respýblıkasyndaǵy ındýstrııalandyrý kúni elimizdiń barlyq óńirinde jańa agroónerkásiptik, ındýstrıaldy-ınnovasııalyq jobalar iske qosylyp jatyr. Dál osy ındýstrııalandyrý kartasy boıynsha bizdiń Batys Qazaqstan óńirinde 8 aı ishinde jalpy quny 8,2 mlrd teńge bolatyn 10 jańa joba júzege asty. 550 jańa jumys orny ashyldy. Elbasynyń tapsyrmasymen biz eksportqa baǵyttalǵan óndiristi arttyrý úshin jumystanýdamyz. Jańaǵy on jobanyń altaýy eksportqa taýar shyǵarýǵa baǵyttalǵan, - deıdi óńir basshysy Altaı Kólginov.
Oblys ákiminiń aıtýynsha, ótken jyly óńirdiń syrtqy taýar aınalymy 4 mlrd. AQSh dollaryn quraǵan. Onyń 500 mln. AQSh dollary Eýrazııalyq ekonomıkalyq odaqtyń úlesine tıedi. Bıylǵy nátıjeler eksport kóleminiń byltyrǵymen salystyrǵanda 10 paıyzǵa óskenin kórsetip otyr.
Qazbek QUTTYMURATULY
«Egemen Qazaqstan»
Sýretti túsirgen Aleksandr KÝPRIENKO