Tuńǵysh Prezıdent kúni qarsańynda Almaty oblysynda atqarylǵan sharýalardyń biri retinde oblystyq ishki ister departamenti men tótenshe jaǵdaılar qyzmetiniń sońǵy úlgidegi jańa kóliktermen qamtamasyz etilgenin aıtýǵa bolady.
Saltanatty túrde ótkizilgen sharada tynyshtyq pen tártipke qyzmet etýge bel býyp, jańadan qyzmetke turǵan birneshe jas maman ant qabyldady. Birqatar qyzmetkerge ofıserlik shen tabys etildi. Qoǵamdyq tártipti saqtaý, turǵyndardyń qaýipsizdigin qamtamasyz etý boıynsha minsiz qyzmet atqarǵan 120-dan astam polısııa qyzmetkeri Ishki ister mınıstriniń Qurmet gramotasymen jáne oblystyq ishki ister departamenti basshysynyń Alǵys hatymen marapattaldy.
Kólik kiltin tabys etý úshin arnaıy kelgen oblys ákimi Amandyq Batalov quttyqtaý sóz sóıledi.
– 2017 jyly oblystyń ishki ister organdaryna 11,9 mıllıard teńge bólindi. Osy qarjynyń 3,2 mıllıard teńgesi materıaldyq-tehnıkalyq bazany nyǵaıtýǵa jumsalyp otyr. Osyndaı qoldaý qylmys pen quqyq buzýshylyqtyń deńgeıin tómendetedi dep senemin. О́ıtkeni oblys turǵyndarynyń ómiri men tynyshtyǵy sizderdiń qyzmetterińizge tikeleı baılanysty. Sondyqtan qoǵam men memlekettiń múddesin jáne azamattardyń quqyǵyn saqtaýda múltiksiz qyzmet etkenderińiz úshin sizderge rızashylyq bildirgim keledi, – dedi ol.
Bul kúni ishki ister departamentiniń kólik bazasy 29 arnaıy qurylǵylarmen jabdyqtalǵan avtokólikpen, al tótenshe jaǵdaılar qyzmetiniń ıeligi jol talǵamaıtyn 10 kólikpen tolyqty. Jıyn barysynda osy kúnge deıin atqarylǵan birqatar sharýalar jóninen esep bergen oblystyq jergilikti polısııa qyzmetiniń basshysy Marat Kúshtibaev aýyldyq jerlerde eriktiler toptary qurylyp, Jetisý jerindegi qylmys pen quqyq buzýshylyqty azaıtýǵa úles qosyp jatqanyn aıtady. Odan bólek, oblys ortalyǵynda qoǵamdyq tártipti saqtaý úshin qala ákimdigi 100 erikti jasaqshyny aılyq jalaqymen qamtamasyz etý úshin 100 mıllıon teńge bólipti. Sonyń arqasynda bıylǵy 10 aıdyń ishinde qala kóshelerinde jasalatyn qylmys pen qoǵamdyq oryndardaǵy tártip buzýshylyq azaıǵan.
Budan bólek, bıyl jeke quramdy tasymaldaý úshin jergilikti polısııa qyzmetkerlerine 5 avtobýs jáne 95 avtokólik alynǵan. Polısııa jasaqtaryn arnaıy jáne belsendi qorǵanys qurylǵylarymen qamtamasyz etý de kún sanap jolǵa qoıylyp keledi. Máselen, 772 portatıvti beınejazba qurylǵysy óńirdegi polısııa qyzmetkerleriniń 93%-nyń qoldanýyna berilipti. Aýdandar men qalalarǵa, halyq kóp jınalatyn qoǵamdyq oryndarǵa 346 beınebaqylaý kamerasy ornatylyp, ár aımaqtaǵy tártip buzýshylyqty oblystyq ishki ister departamentinen tikeleı baqylaýǵa jaǵdaı jasalǵan. Aldaǵy ýaqytta osyndaı 420 beınekamera ornatý jospary tur. Onyń 396-sy oblys ortalyǵy Taldyqorǵan qalasyna qoıylady. Sondaı-aq oblystyń Qapshaǵaı, Tekeli, Qaskeleń, Jarkent syndy 4 qalasyna 550 beınebaqylaý kamerasyn ornatý týraly qujattama daıyndalýda. Taǵy bir jaqsylyqtyń nyshany – oblys boıynsha eki arnaıy qabyldaý mekemesiniń qurylysy bastalypty. Bul, óz kezeginde, atqarýshy bılik pen qarapaıym halyq arasyndaǵy baılanysty nyǵaıtyp, qylmystyq isterge qatysty prosesterdiń ashyq júrgizilýine múmkindik týǵyzady.
Osyǵan deıin jumys istep turǵan turǵyn úıimen qosa salynǵan 44 bekettiń sany 30-ǵa artty. Oblys ákiminiń aıtýynsha, endi 26 bekettiń qurylysy júrgizilip jatyr. Odan bólek, 34 polısııa beketin turǵyzýǵa qajetti qarjy bólingen. Sonyń bárin qosqanda oblys boıynsha 220 zamanaýı ýchaskelik polısııa beketi jaqyn arada paıdalanýǵa beriletin bolady.
Almas NÚSIP, «Egemen Qazaqstan»
Almaty oblysy