Qazir qudaıǵa shúkir, elim degen erlerdiń esimderi tarıxta qalatyndaı eleýli ister atqarylýda. Sanjar Asfendııarovtyń esimi Qazaq ulttyq medısınalyq ýnıversıtetine berilýi – sonyń bir kórinisi.
Atalǵan oqý ornynyń Sanjar Asfendııarovtyń esimimen atalatynynan kópshilik xabardar bolǵanymen, bul bastamanyń qalaı júzege asyrylǵanyn ekiniń biri bile bermeıdi. Sol sebepti osy oqıǵaǵa baılanysty ózim kýá bolǵan eki jaıtty baıandaǵym keledi.
Birinshi oqıǵa 1987 jyldyń kúz aılarynda boldy. Men ol kezde ınstıtýttyń 4-kýrsynda oqıtynmyn. Stýdentter kásipodaǵynyń tóraǵasy qyzmetin qosa atqaratyndyqtan, ǵylymı keńeske múshe edim. Úlken jıyn ótip, oǵan barlyq fakýltet dekandary jáne kafedra meńgerýshileri tolyq shaqyrtyldy. Sol basqosýda oqý ornynyń rektory E.Belozerov birneshe eńbek ardagerinen mınıstrlikke S.Asfendııarovtyń esimin atalmysh oqý ornyna berýin suraǵan hattyń túskenin málimdedi. Mınıstrliktegiler osy xatty talqylaý úshin ınstıtýtqa jibergen. Taldaý totalıtarlyq júıede qalyptasqan úrdiske saı júrdi. «Oqý ornyna esimi beriletindeı Asfendııarovtyń qandaı eńbegi sińdi?» degen «sýyq» suraýǵa stomatologııa fakýltetiniń dekany Jánibek Nálibaev bultartpas dálel aıtyp, erdiń eńbegin tizip shyqqanmen, oǵan selt etken eshkim bolmady. Ashyq daýysqa salǵanda da S.Asfendııarov esimi berilmeıtin bolyp sheshildi.
Zyrǵyp ýaqyt ótip jatty. 1989 jyldyń naýryzy bolatyn. Bul joly talqylaýdy ótkizý ınstıtýttyń úlken ǵylymı keńesiniń enshisine tıdi. Álgi rektor mınıstrliktiń nusqaýymen S.Asfendııarovtyń esimi ınstıtýtqa berilsin degen habar kelgenin baıandady. Endigi sheshim – muǵalimder men professorlardyń jáne stýdentterdiń qoldaýyna táýeldi.
Ol kezde ózin-ózi basqarý júıesi iske asyp jatqan. Úlken keńeske 11 stýdent múshe bolatyn. Professor, balalar dárigerleri fakýltetiniń dekany bolyp jańadan saılanǵan K.Ormantaevtyń jıynda taldaý týraly áńgimeniń kerek emesin, «daýys berý» ádisiniń tipti ersi bolatynyn aıtqany kópshilikke seń buzylǵandaı áser etkenimen, kelesi bir «sańlaqty» kúteıik degender de boldy. Degenmen áńgime jaqsylyqqa buryldy da, «jasyryn daýys» berý týraly sheshim qabyldandy. Qyzyq jaǵdaı daýystyń sheshimin habarlaǵan shaqta oryn aldy. О́ıtkeni Asfendııarovty jaqtap daýys bergender eki-aq adamǵa artyq túsipti. 29-y qoldaǵan, 27-si qarsy. Alǵash Densaýlyq saqtaý mınıstrligin basqarǵan, Almaty medısınalyq ınstıtýtyn ashýǵa orasan eńbegi sińgen tulǵanyń esimi osyndaı áýre-sarsańmen ázer elengen edi. Murat BERDALIEV, «Júıke aýrýlar ınternat úıiniń» dırektory
Jambyl oblysy