Qostanaıda birinshi ret sybaılas jemqorlyqqa qarsy sharanyń biri «galstýksyz» kezdesý túrinde ótti. Bul sybaılas jemqorlyqpen kúres halyqaralyq kúnine arnaldy.
Onda oblys ákimi Arhımed Muhambetov sybaılas jemqorlyqqa qarsy jumystar jóninde áńgimeledi. Oǵan joǵary oqý oryndarynyń stýdentteri, «Adal urpaq» patrıottyq klýbynyń eriktileri, jas memlekettik qyzmetkerler, oblystyq balalar men jastar uıymdary qaýymdastyǵynyń, «GRıN» azamattyq alıansynyń, Jastar resýrsy ortalyǵynyń, Jastar Máslıhatynyń volonterleri, sonymen qatar «Jas Atmeken» kásipkerler klýbynyń músheleri qatysty.
«Eger qandaı da bir qalada, aýdanda sybaılas jemqorlyq belgisi bilinse, biz sol jerge baryp, kóshpeli májilis ótkizemiz. Árıne, nátıjesi bolmaı qalmaıdy. Eń bastysy qoǵamdyq keseldiń aldyn alamyz. Biz úshin profılaktıka, aldyn alý mańyzdy» dedi Arhımed Begejanuly.
О́ńir basshysy memlekettik satyp alý kezinde barmaq basty, kóz qysty áreketterden abaı bolýǵa saqtandyrdy.
«Men oblys basshylyǵyna kelgende sotta «Úlken ákimdik isi» júrdi, basqa da keleńsiz ister oryn alǵan bolatyn. Bul kadrlardy durys tańdap qoıý kerek degen tujyrym jasatty. Kadrlardy jergilikti mamandardan tańdadym. Qostanaıǵa men kelgende onyń ákimi de, basqa mamandary da joq boldy, barlyǵy da qylmysty iske shatylǵan eken. Qala qysqa daıyndyqsyz boldy, basqa da kóptegen ózekti máseleler turdy. Bizge osy qıyndyqtardyń barlyǵyn da úzilissiz, turyp qalmaı sheshý kerek boldy. Onyń barlyǵynan, tyǵyryqtan shyqtyq. Osyndaı oqıǵalardan keıin memlekettik satyp alýdy basqarýǵa basshyny asyqpaı muqııat tańdadyq» dedi Arhımed Begejanuly.
Oblys ákimi kezdesýge qatysýshylardyń kóptegen suraqtaryna jaýap berdi. Ol bir suraqqa oraı, qazir dabyrlatqan úlken forýmdar kútkendegideı nátıje bermeıtinin, oǵan qarjy da kóp ketetinin aıtty. Eń bastysy, istiń nátıjesi boatyndaı jumystar júrgizý qajet dedi.
Kezdesýde memlekettik qyzmet jáne sybaılas jemqorlyqqa qarsy is-qımyl departamentiniń bastyǵy Berik Bekjanov jáne taǵy basqalar pikirlerin ortaǵa saldy.
Názıra Járimbet,
«Egemen Qazaqstan»
Qostanaı