Oblys ákimi Qumar Aqsaqalovtyń qatysýymen alǵash ret uıymdastyrylǵan «Ashyq esik kúni» qabyldaýyna 115 adam kelip, olardyń 35-i aımaq basshysyna jeke ótinishterin jetkizdi.
«100 naqty qadam» Ult josparynda kásibı memlekettik apparat qurýdyń joldary naqty atap kórsetilgen. Olardyń ishinde «Ashyq úkimetti» engizý, memlekettik organdar basshylarynyń halyq aldynda esep berýlerin tájirıbege engizý, azamattardyń sheshim qabyldaý úderisine qatysý múmkindigin keńeıtýge basymdyq berilgen. Petropavl qalasy men barlyq aýdandarda uıymdastyrylǵan «Ashyq esik kúni» óz deńgeıinde ótip, tolǵaqty problemalar men shetin máseleler birlesip talqylandy. Oblys turǵyndary tarapynan jer telimderin alý, sapaly aýyz sý jetkizý, aýyldarda kásipkerlikti damytý, turǵyn úı-kommýnaldyq sharýashylyq jaıy kóbirek qozǵaldy.
Ákimniń qabyldaýyna kelgenderdiń biri Ýálıhan Ibraev múgedekter úshin jyljymaly monsha oılap tapqanyn, joba EKSPO-2017 mamandandyrylǵan halyqaralyq kórme sheńberinde ótken baıqaýda joǵary baǵalanǵanyn, endi qarjylyq qoldaý qajettigin jetkizdi. Aımaq basshysy Qumar Aqsaqalov jeke kásibin ashqysy kelgen oǵan kómek kórsetiletinin, qoldaý jasalatynyn aıtyp, ozyq ıdeıa avtoryn qýantyp tastady. Alevtına Onıshenkonyń aıtpaǵy qurylys jumystaryndaǵy beı-bereketsizdik eken. Kópshiliktiń demalys ornyna, balalardyń oıyn alańyna aınalǵan shaǵyn baq aýmaǵy jeke kásipkerdiń ıeligine ótip ketken. О́ńir jetekshisi máseleniń anyq-qanyǵyna kóz jetkizý úshin turǵyndarmen arnaıy kezdesetinin qadap aıtty.
Aryz aıta kelgenderdiń biri Bolat Espanovty baspana jaıy alańdatady eken. Ol «Bereke» shaǵyn aýdanynda jer úı salǵanyn, ol aýmaqqa mektep qurylysy júrgiziletindikten ony buzý jóninde qalalyq ákimdik sheshimi shyqqanyna shaǵymdandy. «Benzostroı» aýmaǵynda kóp qabatty úıler, basqa da mádenı, áleýmettik nysandar turǵyzylyp, ásem qalashyq boı kóterip keledi. Al sizdiń máseleńizge kelsek, esh alańdamaýǵa bolady. Syrylǵan úılerdiń ıelerine ótemaqy tólenedi nemese páter beriledi, dedi Qumar Irgebaıuly.
– Halyq pen bılikti jaqyndastyratyn júzbe-júz kezdesýler jumystyń tıimdiligin arttyryp, tikeleı baılanysty qamtamasyz etedi. Qozǵalǵan máselelerdiń birde-bireýi aıaqsyz qalmaıdy. Birqatary qolma-qol sheshimin tapty. Ákimshilik kedergiler men bıýrokrattyq kórinisterdi múmkindiginshe azaıtatyn munadaı qoǵamdyq qabyldaý toqsan saıyn ótkiziletin bolady, – dedi Q.Aqsaqalov BAQ ókilderine bergen suhbatynda.
О́mir ESQALI,
«Egemen Qazaqstan»
Soltústik Qazaqstan oblysy
Sýretti túsirgen
Talǵat TÁNIBAEV