Almaty tórinde Qazaqstan musylmandarynyń kezekti segizinshi quryltaıy ótip, dinı basqarma basshylyǵyndaǵy birqatar aýys-túıister alqaly jıynnyń basty jańalyǵyna aınaldy. Sońǵy bes jylda elimizdiń bas múftıi qyzmetin atqaryp kelgen Erjan qajy Malǵajyuly óz erkimen qyzmetinen ketip, ornyna elimizdiń bas múftıi bolyp Serikbaı qajy Orazuly saılandy.
Quryltaıdy ashyp bergen elimizdiń Din isteri jáne azamattyq qoǵam mınıstri Nurlan Ermekbaev atalǵan basqosý Dinı basqarmanyń ózekti máseleler týraly ashyq ári shynaıy áńgime qurýǵa jáne aldaǵy bes jylǵa arnalǵan mindetterin naqty aıqyndaýǵa jaqsy múmkindik bolatynyna senim bildiretinin aıtty.
Basqosý barysynda Serikbaı Orazdyń kandıdatýrasyn Erjan Malǵajyuly usyndy. Elimizdiń ár túkpirinen kelgen 300-den astam delegat bul sheshimdi biraýyzdan qoldap, senim bildirdi. Osylaısha, Serikbaı qajy Orazuly aldaǵy bes jylda bas múftı qyzmetin atqaratyn bolady. Al jańa múftıdiń orynbasary laýazymyna Naýryzbaı qajy Taǵanuly, Baýyrjan Esmahanov, Alaý Ádilbaev taǵaıyndaldy. Quryltaıǵa Qazaqstan musylmandary dinı basqarmasynyń tóralqa músheleri, Ǵulamalar keńesiniń músheleri, teolog-ǵalymdar, zııaly qaýym ókilderi men ár oblystan kelgen quryltaı qonaqtary qatysyp, jańa dinbasynyń qyzmetine tolaıym tabystar tiledi.
Astana qalasy ádilet departamenti dinı ister bóliminiń bas mamany, memlekettik qyzmet isteri agenttiginiń aǵa qyzmetkeri, Prezıdent Is basqarmasynyń ákimshilik ǵımarattar dıreksııasynyń dırektory sııaqty birqatar jaýapty qyzmetterde bolǵan Serikbaı Orazuly 2013 jyldyń qazan aıynan bastap búgingi kúnge deıin «Áziret Sultan» meshitiniń bas ımamy jáne naıb múftı qyzmetin atqaryp kelgen edi. Al buǵan deıin bas múftı laýazymynda bolǵan Erjan qajy Malǵajyuly Almatydaǵy «Nur-Múbárak» Qazaqstan-Egıpet ıslam ýnıversıtetine basshylyq qyzmetke baratyny málim boldy.
Arman OKTIаBR,
«Egemen Qazaqstan»
ALMATY