Qııalǵa qanat bitiretin ǵalamattyń biri óziniń qupııasyn ári barlyq qyry men syryn ishine búgip jatatyn sheti men shegi joq aspan álemi desek, qatelese qoımaspyz. Túngi juldyzdy aspan, kók júzine qonaqtaǵan ásem aı, qus jolyndaı saǵymdanǵan Jetiqaraqshy, tań ata týatyn Sholpan juldyz kimderdiń armanyn alysqa samǵatpady. Jeti qabat kóktiń syryn bilýge bala bitkenniń bári de qushtar bolǵany aıdan anyq. Aqtóbede budan tup-týra 50 jyl buryn ashylǵan planetarıı osy armandar men qııaldardy odan ári ushtaýǵa, jasóspirimderge tylsym álemniń tynysyn sezinýge qyzmet jasap keledi.
Osydan jarty ǵasyr buryn qurylǵan aıryqsha ortalyqtyń búgingi tańda da elimizde eshqandaı balamasy bolmaı otyr. О́z qyzmetin táýelsiz elimizde derbes óz joly baryn tanytyp úlgergen astronomııa jáne ǵarysh salalarymen tyǵyz baılanysty júrgizip otyrǵan Aqtóbe planetarııiniń elimizdiń qoǵamdyq jáne mádenı ómirinde alatyn orny bólek. Bul erekshe ortalyq aspan denelerin zerdeleýge qatysty barlyq talaptarǵa jaýap bere alady. Ásirese onyń aldaǵy maqsatyn joǵaryda atalǵan salalarmen baılanystyrǵysy keletin jetkinshekterge tıgizetin shapaǵaty men taǵylymyna eshqandaı baǵa jetpeıdi. Atalǵan planetarııdiń dırektory Qorlan Bólekov bizge óz oı pikirin bylaısha jetkizdi.
– Qazir ujymda jıyrma adam jumys isteıdi. Bizde túngi aspanda jymyń qaqqan juldyzdarmen ishteı syrlasqysy keletinderge arnalǵan bólme bar. Oǵan bir mezgilde elý adam sııady. О́zgeshe bir juldyzdar álemine enýge qyzyǵýshylyq tanytqandar osy arada da maqsattaryna jete alady. Damýdyń búgingi qarqyndy kezeńi planetarııdegi tehnıkalar men qondyrǵylardy udaıy jańǵyrtyp turýdy qajet etedi.
Aqtóbe planetarııi jas talǵamaıdy. Onyń qyzmetimen tanysqysy kelgen úlken de, kishi de munda aspan áleminiń qyr-syryna qanyǵa alady. Bul baǵytta arnaıy ashylǵan úıirmelerge qatysýǵa yqylas bildirgen ul-qyzdar da jetkilikti. Olardyń arasynda halyqaralyq olımpıadalarda júldeli oryndarǵa ıe bolyp júrgender de bar. Planetarııge kelýshiler qaı kezde de tolastaǵan emes.
Temir QUSAIYN, «Egemen Qazaqstan» AQTО́BE