Jyl sońy almatylyq muǵalimderdi birqatar jaǵymdy jańalyǵymen qýantty. Sonyń biri shaharda buryn-sońdy bolmaǵan, eńsesi bıik «Ustazdar úıi» ǵımaratynyń boı kóterýi. «О́rleý» biliktilikti arttyrý ulttyq ortalyǵy» AQ-tyń uıymdastyrýymen qaladaǵy barlyq muǵalimderdiń basty ordasyna aınalǵan ortalyqtyń saltanatty ashylý rásimi ótti.
О́tken ǵasyrdyń alpysynshy jyldary qurylǵan Almaty qalalyq muǵalimder bilimin jetildirý ınstıtýty búginge deıin óziniń ornalasqan jerin birneshe márte aýystyrdy. Instıtýt eki ret balabaqsha ǵımaratynda, odan mýzykalyq jáne jalpy bilim beretin mektep janyna aýysyp, kóshpeli kúı keshti. Instıtýttyń jeke ǵımaratynyń bolmaýy bilim berý qyzmetteriniń mindetterin óz dárejesinde iske asyrýda aıtarlyqtaı qıyndyq týǵyzyp kelgen edi. Endi kópten kókeıde júrgen másele oń sheshimin tapty. Bilim jáne ǵylym mınıstrligi jáne «О́rleý» BAUO» AQ basqarmasynyń qamqorlyǵynyń arqasynda Almaty qalasy boıynsha pedagogıkalyq qyzmetkerlerdiń biliktiligin arttyrý ınstıtýty jeke ǵımaratqa ornalasyp, al qala muǵalimderi ustaz qaýymynyń ortaq shańyraǵy – «Ustazdar úıine» qol jetkizip otyr. Qala pedagogteri «Ustazdar úıinde» biliktiligin arttyrý kýrstarynda oqytylyp, ádistemelik kómek ala alady. Oǵan qosa ortalyq muǵalimderdiń tájirıbe almasý alańyna aınalyp, pedagogıkalyq ınnovasııalardy júzege asyrýyna jol ashpaq.
– «Ustazdar úıiniń» esigi qala muǵalimderi úshin árqashan ashyq. Jańa ǵımaratta zamanaýı qural-jabdyqtarmen jabdyqtalǵan aýdıtorııalar, robot-tehnıka, Montessorı kabınetteri, beıne jáne dybys jazý stýdııalary, 200 adamǵa arnalǵan saltanat zaly bar. Qazirgi ýaqytta Almaty qalasy muǵalimderiniń kásibı deńgeıin damytý úshin barlyq jaǵdaı jasalǵan. Zaman talabyna saı jabdyqtalǵan, eńsesi bıik, muǵalimderge arnalǵan biliktilikti arttyrý ulttyq ortalyǵy bilim salasynyń keńge qanat jaıýyna septigin tıgizip, ustaz bedelin arttyra túsýge qyzmet etedi. Qazirgi tańda mektepterde jańartylǵan bilim baǵdarlamasy engizilýde. Muǵalim bilikti bolsa, maqsat-mindetterin jaqsy bilse, shákirtter de naǵyz bilikti azamat bolyp qalyptasady, deıdi «О́rleý» BAUO» AQ basqarma tóraıymy Gúlnaz Ahmetova.
Sý jańa ortalyqtyń ashylý rásimimen qatar «О́rleý» biliktilikti arttyrý ulttyq ortalyǵy» AQ «Microsoft Kazakhstan» kompanııasymen birlesip, mektep muǵalimderi men kolledj oqytýshylary úshin uıymdastyrǵan «Smart-pedagog О́rleý: kásibı tabysqa aparar jol» respýblıkalyq konkýrsynyń jeńimpazdaryn marapattady. Baıqaý qorytyndysy boıynsha jeńimpazdar men júldegerlerge dıplom jáne aqshalaı syılyqtar, al barlyq qatysýshylarǵa sertıfıkattar tabys etildi.
Arman OKTIаBR, «Egemen Qazaqstan»