Oral qalasynda ashylǵan bul ortalyqtyń ádettegi halyqqa qyzmet kórsetý oryndarynan ózgesheligi kóp. Munda shaǵyn jáne orta bıznes ókilderine keshendi qyzmet kórsetetin arnaıy keńse jumys isteıdi. Bul jerde kásipkerlik nysanyn ashý, isin júrgizýge qatysy bar barlyq mekeme «bir tereze» qaǵıdasymen shoǵyrlanǵan. Iаǵnı jeke kásipker osy ortalyqqa kelip, búkil sharýasyn sheship ketedi.
Bul joba Qazaqstan Respýblıkasy Prezıdentiniń «100 naqty qadam» Ulttyq josparynda belgilengen tapsyrmalardy oryndaý jolynda júzege asyp otyr.
«Jappaı kásipkerlikti qoldaý tetikterin odan ári jetildirý kerek. Qazaqstannyń ár óńiri jappaı kásipkerlikti, sonyń ishinde otbasylyq kásipkerlikti damytý baǵytynda keshendi sharalar usynýǵa tıis... Memlekettik qyzmetter kórsetý úderisi meılinshe ońtaılandyrylýǵa tıis. Qujattardyń merzimi men tizbesin qysqartyp, qaıtalanatyn rásimderdi joıý kerek. Bul oraıda adamnyń óziniń barýyn qajetsinbeıtin tolyq elektrondyq formatqa kóshirý kerek» degen bolatyn Elbasy «Qazaqstannyń úshinshi jańǵyrýy: jahandyq básekege qabilettilik» atty joldaýynda.
- Elbasynyń sıfrlandyrý týraly tapsyrmasyna sáıkes ashylyp otyrǵan «Smart Oral» ortalyǵy qyzmet kórsetý sapasyn jetildirýdi kózdeıdi. Munda qarapaıym halyq pen kásipkerlerge de qyzmet kórsetý ortalyǵy, sonyń ishinde «Atameken» ulttyq kásipkerler palatasy, «Qazaqınvest» UK, jergilikti atqarýshy organdar men basqa da salalardyń ókilderi otyratyn bolady. Sondaı-aq quqyqtyq qyzmet kórsetýdiń de qoljetimdi ári jedel bolýyn qamtamasyz etý úshin prokýratýra qyzmetkerleri de kómek kórsetedi. Bir ǵana mysal aıta keteıin, buryn kásipker jer telimine ruqsat qaǵazyn alý úshin 14 mekemege baryp, árqaısysyna 5 kún jumsaıtyn bolsa, aldaǵy jyldan bastap osy qyzmetterdiń bárin elektrondy túrde bes-aq kúnniń ishinde ala alady, - dedi ortalyqtyń ashylý saltanatyna qatysqan Batys Qazaqstan oblysynyń ákimi Altaı Kólginov.
Bul ortalyqqa kelgen turǵyndarǵa qyzmet kórsetý 15-20 mınýttan aspaıdy deıdi mamandar. Elektrondy kezek, kútý zaly qamtamasyz etilgen. Kórsetiletin qyzmet túri de kóbeıip, 618-den 641-ge jetipti.
«Smart Oral» ortalyǵynda Batys Qazaqstan oblysy prokýratýrasynyń «Azamattardy qabyldaý ortalyǵy» da búginnen bastap jumys isteı bastady. Munda azamattardy qabyldaý, prokýratýra organdarynyń quziretine jatatyn quqyqtyq suraqtar boıynsha keńes berý, jeke jáne zańdy tulǵalardyń ótinishterin qabyldaý, oblys, aýdan prokýratýrasynyń basshylaryna qabyldaýǵa jazylý, aryz-shaǵymdardy qaraý nátıjesi boıynsha málimet jáne jaýaptardyń kóshirmesin berý, prokýratýra ǵımaratyna kirýge ruqsat berý jáne kelýshilerdi qarsylap alý qyzmetteri usynylady.
Atalmysh ortalyqta oblys prokýratýrasynyń salalyq qyzmetteriniń kezekshi prokýrorlary, oblys prokýrorynyń ótinishterdi qaraý jáne is júrgizý boıynsha aǵa kómekshisi, keńesshi-konsýltanttar jáne basqa da mamandar qyzmet kórsetedi.
Batys Qazaqstan oblystyq kásipkerler palatasy ortalyǵy dıretorynyń orynbasary Marat Nurǵýatovtyń aıtýynsha, kásipkerlik pen prokýratýra organdarynyń qatar otyrýy kásipkerlikti damytýǵa oń yqpal etip, zań buzýshylyq pen qateliktiń aldyn alýy tıis. Al Oral qalasynyń ákimi Murat Muqaev 2018 jyly Oral qalasynyń kópshilik jınalatyn oryndarynda qoǵamdyq WI-FI iske qosylatynyn, bolashaqta turǵyndar barlyq kommýnaldyq tólemderdi bir núkteden tóleý múmkindigi jasalatynyn málimdedi.
Qazbek QUTTYMURATULY, «Egemen Qazaqstan»