«Turan-Astana» ýnıversıtetiniń 20 jyldyǵyna arnalǵan «Interaktıvti tehnologııalardy engizý – týrızmniń turaqty damý faktory» atty respýblıkalyq ǵylymı-praktıkalyq semınar ótti.
Mereıtoılyq is-shara aıasynda «Turan-Astana» ýnıversıteti Týrızm ındýstrııasy komıtetimen birlese otyryp «Interaktıvti tehnologııalardy engizý – týrızmniń turaqty damý faktory» atty respýblıkalyq ǵylymı-praktıkalyq semınaryn uıymdastyrdy. Ustazdar men izdenýshiler qaýymy bas qosqan alqaly jıynǵa Týrızm ındýstrııasy komıtetiniń tóraǵasy Maınıýra Mýrzamadıeva, «Turan-Astana» ýnıversıtetiniń rektory Gúljamal Japarova, aımaqtyq ákimshilikterdiń ókilderi men týrıstik operatorlar, sondaı-aq týrızm salasynda mamandar daıyndaıtyn JOO ókilderi, magıstranttar jáne týrızm kafedrasynyń professorlyq-oqytýshylyq quramy qatysty.
«Jalpy álemdik týrızmde IT – tehnologııa taqyrybynyń ózektiligi kezdeısoq paıda bolǵan joq. О́ıtkeni, aqparattyq tehnologııa damyǵan memleketterdiń qoǵamdyq qarym-qatynas júıesiniń aıqyn erekshelikteriniń biri bolyp sanalatyndyqtan, adamzat barlyq qyzmet salalarynda órkenıet jetistikterin ıgilikke jaratýda jáne ol zor mańyzǵa ıe bolǵandyqtan qaryshty damý kezeńine aıaq basty» dedi G.Japarova jıynnyń ashylý saltanatynda sóılegen sózinde.
Onyń aıtýynsha, dúnıejúzinde kompıýterlik jeli – Internet qarqyndy damyp kele jatqandyǵy sonshalyq, jyl saıyn ony paıdalanýshylardyń sany men aqparattyq resýrstardyń kólemi udaıy eselenýde.
Al Týrızm ındýstrııasy komıtetiniń tóraǵasy Maınıýra Mýrzamadıeva bolsa, tehnologııalyq mundaı jetistikten elimizdiń týrıstik naryǵy da qalyspaı, tıisti deńgeıde damyp jatqanyn aıtady.
«Týrızm salasy qazirgi tańda iri áýekompanııalary men zamanaýı qonaq úı jelileri syndy alyp kompanııalardyń áleýetine teńestirilgen. Sondyqtan da biz elimizdegi joǵarǵy oqý oryndary daıyndaıtyn salalyq mamandardy daıarlaý isinde álemdik deńgeıdegi ozyq úlgilerdi negizge alýymyz kerek», dedi ol.
Aıta keteıik, osydan 20 jyl buryn el astanasynyń Astana qalasyna kóshirilýine baılanysty, 1998 jyldyń mamyr aıynda «Turan» ýnıversıtetiniń Almatydaǵy basshylyǵy jańa astanada fılıal qurý týraly sheshim qabyldaıdy. Nátıjesinde, 2004 jyly «Turan» ýnıversıtetiniń fılıaly táýelsiz «Turan-Astana» ýnıversıteti retinde ashylǵan. Búginde bul ýnıversıtette 16 mamandyq boıynsha bakalavrıat jáne 10 mamandyq boıynsha magıstranttar bilim alýda.
Sondaı-aq, oqý orny sońǵy jyldary kásipkerlik baǵyttan ınnovasııalyq kásipkerlikke den qoıa bastady. Bul turǵyda ýnıversıtette bilim, ǵylym jáne qoǵam salalarynda ınnovasııalyq qyzmetpen aınalysatyn qyzmetkerlerdi, oqytýshylardy jáne stýdentterdiń ózin tartýda úlken jumystar júrgizilýde.
20 jyldyq jumysta ýnıversıtet naqty ekonomıkalyq sektorda jumys isteıtin, memlekettik jáne dıplomatııalyq qyzmette, banktik jáne qarjylyq salalarynda, ártúrli óndiristerde, kommersııalyq, zańdy, týrıstik fırmalarda jáne elimizdegi san qıly kásiporyndarda qyzmet atqaratyn 10 myńnan astam maman ıelerin daıyndap shyǵardy.
Nurlybek DOSYBAI, «Egemen Qazaqstan»